Platformê Weşîye yê Amedî nobeta vera hêrişanê Rojava domneno. Platformî ewro reyna vengdayîş kerd û vat: “Ganî lezûbez berê sînorî bêrê akerdene û ma bieşkê xo biresnê şarî.”
Hêrişê çeteyanê HTŞ û DAIŞ’î bi paştîdayîşê Tirkîya vera Rojava dewam kenê. Sewbîna bi rojan o şaristanê Kobanî hetê çeteyan ra ameyo dorpêçkerdene û vernîya hetkarîya merdimî û xizmetê weşîye ameyê girewtene. Plotformê Weşîye yê Amedî bi rojan o bi waştişê abîyayîşê korîdorî, çalakîya nobeta heqê cuye virazeno. Platformî ewro zî vernîya Nêweşxaneyê Unîversîteya Dîcleyî de çalakîya xo domnaye û pankartê “Ma seba heqê cuye nobete gênê” akerd û sloganê “Bijî berxwedana Rojava” , “Jin Jiyan Azadî” ameyê vatene.
Nameyê Platformî ser o Temsîlkarê SES’î yê Unîversîteya Dîcleyî Sezgîn Gulerî eşkerayî wende.
‘Wêrankerdiş ‘Rijnayîş weşîya şarî xirab keno’
Sezgîn Gulerî îfade kerd ke Rojava de krîzê merdimîye her saete vêşêr beno. Bi taybetî Kobanî û Hesekê, şaristanê ke hetê arteşa ereb a Sûrîye ya girêdayeyê rayberîya demkî bi birnayîşê awe û elektrîkî ameyê dorpêçkerdene, rewşêka zaf bi tehluke viraşta ke beno ke biba sebebê qirkerdişî. Sezgîn Gulerî dîyar kerd ke çîyê ke Rojava de qewimîyenê xo reyde rijîyayîşêko sîstematîk û krîzêko giran ê ke weweşîya şarî xirab keno. Gulerî vat ke merdimî Kobanî de dorpêç de yê û waşt seba hetkarîya merdimî biresa Kobanî, ganî Berê Sînorî ê Murşîdpinarî bêrê akerdene.
‘Berê sînorî akerê’
Rayberê Yewîya Tabîban Mehmet Şerîf Demîrî zî vat ke înan sey rêxistinanê komelî yê sivîlî senî seba Xeza hetkarî kerde, ewro zî wazenê şêrê Rojava hem hetkarî bikerê hem zî paştîdayene bidê û vat: “Ma wazenê ke berê sînorî ê Murşîdpinarî ke seba resayîşê Kobanî ganî lezûbez bêro akerdene û heme hetkarîya merdimî biresa herême. Netîce de ma wazenê tekrar bikerê ke şer problemê weşîya şarî yo û reçeteye nê problemî aştî ya.”
‘Ganî ma xo biresnê şarî’
Hemserekê SES’î yê Amedî Mehmet Nûr Ûlûsî qisey kerd û vat: “Mabênê ma û şarî de sînorêk est o. Eke hetê Rojava vêşan, têşan û bêderman bimano ma nêeşkenê tîya de vinderê, eke hetê Rojava de cuye çin ba, cuye tîya de zî çinî bena. Ma wazenê xo biresnê şarê Kobanî û Rojava.”
Badê eşkerayî kedkarê weşîye seba wedaritişê dorpêçê serê Kobanî û qedînayîşê hêrişanê vera Rojava 15 deqîqe çalakîya roniştişî viraşte û dima zî nobeta ewroyî qedîyaye.
