Zanistê îlmanê komelkîyan ê Îskoçya Prof. Andrew Ross mesajê piştgirîye de ke seba “Vengdayîşê Aştî û Komelê Demokratîkî” yê Rayberê Şarê Kurdî Abdullah Ocalanî erşawit, seba prosesê neweyî, bale ant modelê komelê têduştî ke têkoşînê kurdan veto meydan.
Rossî mesajê xo de ke erşawito Partîya Têduştî û Demokrasî ya Şaran (DEM Partî) vat ke modelê komelê demokratîkî ke têkoşînê azadîya kurdan veto meydan, demê modernî de numûneyêk o ke kêmî yeno dîyene û venga hukmatê Tirkîya da ke prosesê aştî sey firsendêko tarîxî bierjno.
Mesajê Rossî wina yo:
“Têkoşînê Kurdan, hetê sere ra heta binî modelêko newe yê komelê têduşt veto meydan. Demanê modernan de ma kêmî rey, belkî zî qet, şahîd nêbîyê ke demokrasîya wina bêra averberdene. Qerarê bêçekîye û fesihkerdişê rêxistine gamêka cesûre bîye. Reyna entegrasyonê şarê kurdan yê seba strukturê sîyasî yê Tirkîya tena eşkena biba çimeyê hêvî û qewetî. Hukmatê Tirkîya ganî no firsendo tarîxî rind bixebitno ke peymana aştî bikero rêxistinêka newa û zaf-kulturî.”
Andrew Ross kam o?
Andrew Ross ke serra 1956î de ameyo dinya û eslê xo Îskoçya ra yo, Unîversîteya New Yorkî (NYU) de sey profesorê Xebatanê Amerîka xizmet keno. Ross ke polîtîkayanê şaristan, ameyoxê kede, ekonomîya globale, heqê kedkaran û edaletî de yeno zanayene, eynî wext de çalakîkerêko aktîf o ke vera kedwerîye têkoşîn dano.
Xebatanê Rossî organê weşanî yê muhîman sey The New York Times, The Guardian û The Nation de ca girewto.
