Prof. Vîctor Wallîs ê DYA’yij bi mesajêk paştî daye vengdayîşê Abdullah Ocalanî û vat: “Sosyalîzmo demokratîk û aştîyane yê Ocalanî ke pêşnîyaz keno, seba ke ma fikir û cuya xo bikerê ekolojîk, hêvî dano heme têgêrayîşanê antîkapîtalîst ê dinya.”
Paştîya mîyanneteweyî ya seba “Vengdayîşê Aştî û Komelê Demokratîk” ê Rayberê Şarê Kurdî Abdullah Ocalanî her ke şono hîna zaf bena. Zanyarê sîyasetî, nuştox, akademîsyen û aktîvîstê DYA’yî Prof. Vîctor Wallîs zî paştîya xo îfade kerd. Profesor Wallîs ke pêşenganê sosyalîzmê ekolojîk ra yew o, DEM Partî rê mesajêk erşawit û paştî daye vengdayîşê tarîxî.
Wallîsî mesajê xo de wina vat: “Ez paştî dana vengdayîşê Abdullah Ocalanî û prosesê aşrî yê Tirkîya. Meseleyê kurdî atengîya tewr pîle ya vernîya demokratîkbîyayîşî Tirkîya yo. Na rewşe tena zerar nêdana mexdûran, eynê wextî de zerar dana pêroyê komelî. Çareserîya demokratîk û aştîyane ya meseleyê kurdî do tesîrêko pozîtîf cuya her kesî ke Tirkîya de ciwîyenê ser o, bikera. Heto bîn ra; sosyalîzmo demokratîk û aştîyane yê Ocalanî ke pêşnîyaz keno, seba ke ma fikir û cuya xo bikerê ekolojîk, hêvî dano heme têgêrayîşanê antîkapîtalîst ê dinya. Ez heme kesanê ke seba Aştî û Komelê Demokratîkî têkoşîn danê, bi piştgirî silam kena.
