Îdarekarê 78an Xidir Karataş va ke Tirkîya hetêk ra vana aştî, hetêk ra zî Rojawan de hêrîşê şarê kurdan kena û qeyûman erzena şaristanê kurdan û ard ziwan ke eke wina dewam biko do kaosêko newe vejîyo.
Îdarekarê Komela Piştîdayîşî ya 78an Xidir Karataşî prosesê aştî ser o fikrê xo ajansê ma rê îfade kerdî.
Îdarekarê 78an Xidir Karataşî va ke no proseso ke ewro dewam keno seba herême firsendêko pîl o û ganî rind bêro şuxulnayene û wina va: “Rayberê Şarê Kurdan reyde pêvînayîş beno û eke Tirkîya goreyê vatişanê xo samîmî biba do aştî bibo.”
Wazena heqê kurdan wedaro
Karataşî îfade kerd ke bi no hewa ciwîyayîşê şarê herême do hîna rehet û aram bo û qiseykerdişê xo de bale ant Tirkîya ser o û va ke Tirkîya hetêk ra vana aştî, hetêk ra zî Rojawan de hêrîşê şarê kurdan kena û qeyyûman erzena bajaranê kurdan û wina va: “Do kaosêko newe vejîyo. Dewlete cergan xebitnena û nê cergî mendeyê DAIŞ’î yê. Tirkîya bi nê cergan wazena kurdan û heqê înan wedaro. Komarî awanbîyayîşê xo ra heta ewro senî kerdo wazeno ewro zî wina ê çîyî dewam biko.”
Sûrîye de vernîya kurdan bigîro
Karataşî va ke Tirkîya Surîye de wazena ke vernîya kurdan bigîro û heme şarê ke uca de ciwîyenê binê banê îslamîyetê sîyasî de asîmîle biko û wina domna: “Coka piştî dana HTŞ’yî û rayîrê ci akena. Tirkîya naye ra îstîfade kena û SMO’yî xebitnena û bi SÎHA û ÎHAyan hêrîşê şarê kurdan kena. Ganî vernîya nê çeteyan bêro girewtene û nêro verdayene ke hêrîşê şarî û Awbendê Tişrînî biko. Uca de şarê erebî û yê bînî zî şinê hetê QSD’yî de vindenê û awbendê xo pawenê. Tirkîya uca de şarê sîvîl bombadûman kerdo û no sucê merdimîye yo. 5 kesî merdê û 15 kesî zî bîyê birîndar.”
Pêvînayişê Abdullah Ocalanî
Karataşî eşkera kerd ke Tirkîya hetê ekonomîyî ra xetimîyaya û şar êdî nêeşkeno debara xo biko û îfade kerd ke Tirkîya mecbur a ke rayberê şarê kurdan reyde pêvînayîşan bikero û goş bido vatişanê ci û wina qedîna: “Karataşî va ke ganî prosesê aştî bi samîmîyet bêro ramitene û pêvînayîşê ke Abdullah Ocalanî reyde yenê kerdene rind bêrê fehmkerdene û averberdene. Kurdî êdî kurdê verênî nîyê û heqê înan zî est o û wazenê bibê wayîrê statuyêk. Şarî de hêvîyêko pîl virazîyayo. Nê wextan de problemê sosyalî zî zêde bîyê. Madeyê tiryak resayo heta gedeyan, fuhuş zaf bîyo û vêşanî ameya merhelaya peyêne. Ganî heme şar bibo yew û destê dekero binê kerra û nê prosesê aştî rê wayîr vejîyo.”
