Xeylê merkezan de zîyaretê Tirkîya yê serekkomarê Sûrîye yo demkî Ehmed El Şarayî ame protestokerdene û ame waştene ke wa çew vera qirkerdişê elewîyan bêveng nêbo.
Serekkomarê Sûrîye yo demkî Ehmed El Şara (Colanî) do beşdarê Forumê Dîplomasî yê Antalya bibo. Xeylê merkezan de zîyaretê Tirkîya yê serekkomarê Sûrîye yo demkî Ehmed El Şarayî ame protestokerdene.
Adana de elewî û cinîyî vejîyayî waran. Çalakîye de Paştdayîşê Morî ser o Pelîne Çîçek qisey kerd û vat: ‘’HTŞ Sûrîye de cinî û elewîyan qetil keno. Vera ney bêveng nêmanê.’’ Antalya de dezgehanê elewîyan Colanî bi eşkerayîyêka çapemenîye şermezar kerd. Çalakîye de sloganê sey ‘’Colanî rê ney’’, ‘’Kiştox wa şoro, haştîye wa bêra’’ ameyî vatene. Îdarekarê PSAKD’î Abdurrahman Karadagî çalakîye de vat ke zîyaretê Colanîyî vera elewîyan hêriş o.
Mersîn de Platformê Kede û Demokrasîyî eşkerayîya çapemenîye daye. Nameyê platformî ser o Mahmut Saricayî vat ke Colanî sûcdarê şerî yo û Tirkîya û Erdogan zî hemkarîya ey kenê. Dezgehê elewîyan Meydanê Rihtimî yê Kadikoyî de kom bîyî. Wekîla DEM Partî Çîçeke Otlu, endamê ESP û Partîzanî zî tewrê çalakîyî bîyî. Çalakîye de eşkerayîya hempare ameye wendene.
