Heyetê PYD’î û tîmê Temsîlkarê Xususî yê NY’yî ke Şam de kombîyayîş viraşt, eşkera kerd ke semedê awankerdişê welatêkê azad û demokratîkî ganî diyalogo zereyî bi beşdarîya heme hetanê sîyasîyan dewam bikero.
Çarçeweya xebatanê averberdişê diyalogê zereyî yê Sûrîye û paştîdayîşê çareserîya sîyasî de, yew heyetê Partîya Yewîya Demokratîke (PYD), vîzêrî (15ê Tebaxe 2025) Şam de, tîmê Temsîlkarê Xususî yê Neteweyanê Yewbîyayeyan (NY) yê Sûrîye Geir Pedersenî û Mudirê Ofîsê Komîserîya Berze ya Heqanê Merdiman Ebdullezîz Ebdullezîzî reyde kombîyayîşêk viraşt.
Heyetê PYD’î, Hemsereka Buroya Eleqeyanê Pêroyî ya PYD’î Sema Begdaş û endamê teşkîlatê partîye yê Şamî Mihemed Emîn û Feyrûz Xelîlî ra pêk ameyêne.
Kombîyayîş de rewşa Sûrîye, rayîrê viraştişê çareserîyêka sîyasî ya pêroyî, averberdişê eleqeyanê komelkî û sîyasîyan ê Sûrîye û her wina awankerdişê bawerîye mîyanê pêrabesteyanê welatî de ameyî muzakerekerdene.
Endamanê heyetê PYD’î bale ante ser vatişanê nefret û kîndarîye êyê ke vera şarê Kurdî û QSD’î yenê kerdene û eşkera kerd ke ganî vera nê nêzdîbîyayîşan bêro girewtene.
Endamanê tîmê Pedersenî ard ziwan ke ê vatişanê nefretî red kenê, paştî danê xebatanê xurtkerdişê eleqeyanê mîyanê pêrabesteyanê şarê Sûrîye û pêameyîşê 10ê Adare ya mîyanê serekê hukmatê demkîye Ehmed El Şerî û Fermandarê Pêroyî yê QSD’î Mezlum Ebdî de.
Tîmê temsîlkarê NY’yî her wina îzeh kerd ke ganî diyalogê zereyî dewam bikerê û da zanayene ke NY paştî dano xebatanê awankerdişê Sûrîyeyêka newîye ke esasê edalet û seyyewbînanî ser o ya.
Peynîya kombîyayîşî de, semedê ardîşê ca yê hêvîyanê şaranê Sûrîye yê awankerdişê welatêkê azad û demokratîkî, girîngîya dewamkerdişê diyalogan û beşdarîya heme hetanê sîyasîyan ameye destnîşankerdene.
