Netîcenameyê Kombîyayîşê Îdareyanê Herêmîyan ê Cinîyan ê DEM Partî ame eşkerakerdene. Kombîyayîş de qerar dîya ke Konfederalîzmê Cinîyan o Demokratîk waranê herêmîyan ra heta her wareyê cuye de bêro caardene.
Kombîyayîşê Îdareyanê Herêmîyan ê Cinîyan ê DEM Partî bi sloganî “Cinî cu ya, cuye xoîdarekerdiş o” mabênê 23 û 24ê gulane de Amed de amebi kerdene. Netîcenameyê kombîyayîşî ame eşkerakerdene.
Netîcename de dîya zanayene ke kombîyayîş de perspektîfê têkoşînê cinîyan, Vengdayîşê Komelê Demokratîkî û aştî yê Rayberê Şarê Kurdî Abdullah Ocalanî û îdareyê herêmî ameyî nîqaşkerdene.
Netîcename de nê qerarî ameyî girewtene;
Bingeyê Komelê Demokratîk û aştî de sîstemê hemserekîye û paradîgmaya ‘cuya têdûşte’ her ca de wa bêrê averberdene.
Konfederalîzmê Cinîyan o Demokratîk waranê herêmîyan ra heta her wareyê cuye de bêro caardene.
Têkoşînê azadîya cinîyan û têgêrayîşê cinîyan wa xurtêr bêrê rêxistinkerdene.
Vera mekanîzmayanê şîdetî, tecawuz, tacîz, teda û kerdişanê xirabanê îqtîdarî nasnameyê cinîya azade bipawîyo.
