Esenyurt ke şero taybetî îsrar keno ke bikero xirab û bihermno, goreyê pêroyê polîtîkayanê îqtidarî têkoşînê zî xo dewam keno.
Esenyurt qezayanê tewr girsan ê Stenbolî ra yew o û bi nifuso girs ê kurdan û estbîyayîşê biqewet ê DEM Partî bîyo hedefê îqtîdarî. Goreyê medyayanê serekîyan sey “qezayanê tewr telûkeyinan ê Tirkîya ra yew” yeno mojnayene, labelê dewlete pêroyê hacetê xo yê şerê taybetî reyde qeza ser o hêrîş keno.
Esenyurt serra 1989î ra heta nika bîye qeza û wexto ke Kurdîstan de şer vejîya meydan û kurdan waşt ke şêrê Stenbol, qeza bîye cayê pêserameyîşê kurdan. Dewleta Tirkan serranê 2000î ra qeza de dest bi pratîkanê şerê taybetî kerd. Verê dest bi bedilnayîşê strukturê demografîkî kerd û endamê DAIŞ’î û rêxistina selefîyan ê ke beşdarê hêrîşanê Rojawanî bîyê, bi nasnameyanê cîyayan. Esenyurt de ameyê bicakerdene.
Ewro Esenyurt de rojane bi desan vindertişê cezayan vejîyenê meydan, kuçeyan ra narkotîkî yenê rotene û fuhş bîyo beşêkê cuya rojaneyî. Bi seyan çeteyê girsî û qijî est ê ke eleqedarê wezîfedaranê dewlet ê û cînayet û sûcanê bînan kenê labelê bi sebebê têkilîya înan a emnîyetî cînayet faîlê înan nêyenê dîyarkerdene.
Qetlê rojnameger Hakan Tosunî 10ê teşrîna verêne de bî û eşkera bî ke mabênê çete û hêzê emnîyetî û makamê cezayan têkilîya înan est a. Badê qetlî, keyeyê yewê tepîşteyî û polîsî lokantayêk de kom bîyê û qisey kerd ke lajê înan bêguneh o. Şarê taxe îfade kerd ke pîyê yew tepîşteyî reyde polîsî pîya xebitênê û seba ke cînayetê lajê xo û yê bînan binimno zaf reyî pere dayo polîsan.
Têkoşînê Azadîya Kurdîstanî û DEM Partî bi tedeyanê dewlete zî vera çetebîyayîş û herikîyayîşê ciwanê kurdan qeza de têkoşîn kenê. Mîyanê serre de zaf çalakgerê DEM Partî bi sebebê nê xebatan ameyê destbendkerdene û tepîştene.
