QSD’yî qewimîyayîşê Helebî sey provokasyonê grûbanê hukmatê demdemî name kerd û veng da dezgehanê însanî û mîyanneteweyî ke semedê vindarnayîşê provokasyonan wa cade têbigêrê.
Hêzanê Sûrîyeya Demokratîke (QSD) derheqê hêrişê grûbanê hukmatê Şamî yê vera taxana Eşrefîye û Şêxmeqsûdî yê Helebî eşkerayîya nuştekîye daye. QSD’yî vat tay organî medya îdîa kenê ke QSD’yî hêrişê tay nuqtayanê kontrolî kerd, no raşt nîyo.
Eşkerayîye de nê ameyî vatene:
“Tay organê medya bi xebaranê xeletan îdîa kenê ke hêzanê QSD’yî dormeyê taxanê Eşrefîye û Şêxmeqsûdî yê Helebî de nuqtayê kontrolî yê mîlîsanê hukmatê şamî hedef girewtî. Ma bi ziwanê qetî vanê ke nê îdîayî bitemamî xelet ê; hêzanê ma çarçeweya pêkerdişê 1ê nîsane de herême ra ancîyayî.
Qewimîyayîşê taxanê Eşrefîyê û Şexmeqsûdî netîceyê hêrişanê grûbanê hukmatê Şamî yê vera sîvîlan ê. Nê grûban şar girewto binê asayîşê pêtî, ablûqa, hetkarî û malzemeyê tibbî birnayî, xeylê sîvîlî remnayî, her roje şar nuqtayanê kontrolî de û dormeyê taxan de proveke kerd û wextê nêzdî de dormeyê taxan de setê herrin nayî ro û ablûqa arde ca.
Nê grûbî bi tanq û wesayîtanê zirxinan cehd kenê ke aver şirê, cayanê roniştişî bi mermîyanê havan û wesayîtanê hewayî yê bêmerdiman hedef genê, no zî beno sebebê merg û birîndanbîyayîşê sîvîlan û zirar dano milkê şarî. Rîyê nê caardişan ra şarî hewcedarîya xopawitişî dîya, eynî wextî de Hêzê Asayîşê Zereyî yê ke taxan pawenê, wezîfeyê xo anê ca.
Ma hukmatê Şamî sey berpirsîyarê nê qewimîyayîşan vînenî ke dejê şarî zafêr kenê û îstîkrarî tehdît kenê. Na rewşe nizdîbîyayîşê hukmatî yê vera însanan û rumetê înan ra mojnena.
Ma veng danê dezgehanê însanî û mîyanneteweyî ke semedê vindarnayîşê na abûlaqaya bêedaletî û hêrişê sîstematîkî û provokasyonan ê vera sîvîlan wa cade lezabez û bitesîrî têbigêrê.”
Se bîbî?
Çend rojî verî Hukmatê Demdemî yê Sûrîye rayîrê ke taxanê Şexmeqsûd û Eşrefîyê resnenê taxanê bînan ê Helebî bi saetan qefilnayî û dormeyê ci de çekê giranî ca kerdî. Şaro ke bi tewirê haştîye vejîya kuçeyan û ablûqa prostesto kerd, raştê hêrişî ame. Hêzanê asayîşî bi mermîyanê raştkîyan û panzeran hêrişê şarî kerd. Hêrişan de tewr tay 15 kesî birîndar bîyî û yeno vatene ke şehîdî zî est ê.
