Komela Huqûqnasan a Seba Azadîye (OHD) derheqê mudaxeleyanê polîs û eskeran ê protestoyan de ke 1ê çeleyî – 2ê sibata 2026î de Tirkîya û şaristananê Kurdîstanî de vera hêrişanê Rojava ameyî kerdene, raporê xo eşkera kerd.
Goreyê raporî, nê prosesî de 842 kesî ameyî destbendkerdene, 118 kesî ke 25ê înan gede bîyê, ameyê girewtene, 106 kesî pirodayîş û heqaretê xirabî reyde rî bi rî mendê.
Îxlalê ke gedeyan rê bîyî
Goreyê raporî, protestoyan de 99 gedeyî ameyî destbendkerdene, 25 gedeyî ameyê girewtene. Ame dîyarkerdene ke gedeyan darb werda, kelepçeyo peyênî înan rê ameyo kerdene û girsan reyde ameyî destbendkerdene.
Şîdet, qedexe û tedaya dîjîtale
OHD’yî dîyar kerd ke zafîya destbendkerdiş û girewtişan bi sebebanê beşdarbîyayîşê eşkerayîyanê çapemenî û protestoyanê bi temamî aştîyane ameyî kerdene. Zaf şaristanan de bi qedexeyanê hîrayan ke walîyan girewt heqê kombîyayîş û protestoyî fîîlen ameyî qedexekerdene.
Raporî de sewbîna ame îfadekerdene ke rojnamegerî bi pirodayîş ameyî destbendkerdene, taqîbê xeberan asteng bî û heqê agahîgirewtişê şarî îhlal bî.
Îxlalê heqan tercîhêko sîyasî yo
OHD’yî dîyar kerd ke çîyê ke qewmîyenê manaya îhlalê giran ê heqê azadîye û ewleyîya şexsî dano û destbendkerdiş û girewtiş tercîhêko sîyasî yo.
OHD’yî venga sazgehanê neteweyî û mîyanneteweyîyan ke destbendkerdiş û girewtişê keyfî bêrê vindarnayene û îdiayê îşkenceyî bêrê cipersayene.
