Endamê Meclîsê Pêroyî yê PYD’yî Ehmed Xoce girêdayeyê hêrişanê hukmatê Şamî vera taxanê Şexmeqsûd û Eşrefîye îfade kerd ke eke vernîya nê hêrişan nêra girewtene do vernîya tehlukeyanê girdan akero û vat: “No şer tena ê cayan de bi sînor nêmaneno do vila bibo.”
Hêzanê hukmatê demkî yê Şamî şewa bîne ra heta nika bêmabên bi çekanê giranan, tang û topan hêrişê taxanê kurdan Şexmeqsûd û Eşrefîye kenê. Mîyanê artêşa Sûrîye de grûbê Hemzat, Emşat, Sultan Murad û Nureddîn Zengî yê girêdayê Tirkîya zî est ê. Verva hêrişanê hêzê ewlekarî yê zereyî û şarê Şexmeqsûd û Eşrefîyê xoverdanê. Merkezê îrtîbatê hêzanê ewlekarîyê zereyî yê Helebî eşkera kerd ke netîceyê hêrişan de heta nika 7 kesan cuya xo vîndî kerda û 54 kesî zî birindar bîy. Seba vindertişê hêrişan Hêzanê Sûrîyeya Demokratîk (HSD) vengdayîşê hêzanê koalîsyonî kerd ke seba rayîr vernî pêkewtişan anêkero hêrişan vindarno. Rixmê nê zî hêrişî serê her di taxan dewam kenê.
Endamê Meclîsê Pêroyî yê Hêzanê Sûrîya Demokratîke (HSD) Ehmed Xocê, rewşa peyêne ya hêrişan ajansê ma rê erjna.
Ehmed Xoceyî ard ziwan ke taxanê Şexmeqsûd û Eşrefîye de dimayê ke HTŞ ame îqtîdar binê abluka de rê. Wina dom kerd: “Her wext tehdîdê hêrişan verva nê taxan estbi. Xora çend rojî verî zî hetê hukmatê demkî ra reyna verva nê her di taxan hêrişî ameybî viraştene. La vizerî ra nahetêrî bi çekanê giranan hêrişê welatijanê sivîlan kenê. Taxan de ti hêzê HSD’î çinî yê. HSD goreyê peymana 1ê nîsanê taxan ra xo tepîya antê ewleyîya taxan hetê hêzanê ewleyî bicayeno. La vizerî ra bi hawayeko hovane hêrişê şarî kenê. Seba ke şar koçber bibo hêrişanê xo domnenê. Heta nika hêzê koalîsyonî bêvengê.”
‘Seba ke zor bidê HSD’î hêrişan kenê’
Ehmed Xoceyî ard ziwan ke amancê hêrişan talkerdişê taxano û wina vat: “Goreyê peymanâ 10ê adare entegrasyonê leşkeri ganî bicaameyenê. Hukmatê Şamî her tim entegrasyon goreyê xo kerd û sey ke HSD’î mîyanê artêşa Sûrîya de bêro helênayene. Dewleta Tirkîya zî rixmo ke prosesê Aştî û komelê Demokratîk yê bakûrê Kurdîstan û tirkîye destpêkerdo zî vano HSD do tasfîye bibo. Vanê ‘HSD goreyê peymana 10ê adare tênêgêreno.’ La no çî rast nîyo. Seba ke zor bidê HSD’î û şertê ke yê wazenê bidê qebul kerdişî hêrişanê nê taxan kenê. Şarê her di taxan xoverdayîşêko bêemsal dano. Hêzê ewleyî zî bi xoverdayîşêko pîl şarê taxan paweno.
‘Eke vernîya hêrişan nêro girewtene şer do pêroyî herême de vila bibo’
Ehmed Xoceyî dewamê qiseykerdişê xo de dîyar kerd ke eke vernîya hêrişan nêro girewtene do rayîr verê tehlûkeyanê pîlan akero û wina va: “Ewro şer tena sere taxan de nîya. No şer de tena uca ra bi sînor nêmaneno. Do vîla bibo. Hukmatê şamî hêrişanê xeylê temsîlkaran û neteweyanê herême keno. No şer do pêroyî Surîyavila bibo. Dêrazor ra bigîrê heta Dear Hefir û heta ver bi sînorê Rojava şer do vila bibo. Do tahlûkeyanê pîlan xo reyde bîyaro. HSd’î zî eşkerayîya xo de nê çîyî dîyarkerdîbi. Do sûrîya de reyna zî şer o ke pêroyî biqewmîyo. Peymana 10ê adare vernî na rewşe girewtêne.
‘Bi waştena tirkîya nê hêrişan kenê’
Ehmed Xoceyî da zanayîşî ke mîyanê artêşa Sûrîya de hêzê girêdayê Tirkîya est ê û wina va: “Tirkîya nê hêzan hêrişan de bikarana. Serra parîne zî wextê ke înan hêrişê bendawe Tişrînî kerd nê çeteyi bikarardî. Tesîrê Tirkîya serê nê gruban est o. Xora bi waştişê Tirkîye ser hêrişan kenê. Tirkîye nêwazena hempeymanê mîyanê Rayberîya Xoser û hukmatê şamî de bireso netîceyê. Eke bireso netîceyê o wext do çareserî zî xo reyde bîyaro. Tirkîya nêwazena aramî bêro ca heme şarî bi îradeyê xo xoser rayra bêrê. Seba ey zî Tirkîya bi destê nê çeteyan pêvînayîşan xerepnena û vernî çareserîyan gênê.”
Bêvengîya hêzanê mîyanneteweyî
Ehmed Xoceyî bale antê sere hêzanê mîyanneteweyî û wina va: “Ehmed El Şara verî lîsteya terorî ya dewletanê mîyanneteweyî de bî. Bado ke verê ey da Heleb û dimayê rijnayîşê rejîmê şamî o rewa kerd. Seba ke hêzê mîyanneteweyî Rojhelatê mîyanên de plananê xo rayîr berê. Merkezê nê planan zî Sûrîya ya. Goreyê menfîetenê xo xêlî amancê xo bi Colanî reyde dîyê. Îsraîl jî seba ke herêma Başur û Rojavayê Surîya bikero bine kontrole xo Colanî ard serê hukmatî. Çend rojî verî zî Îsraîl û DYA’yî reyde pêvînayîş viraşt. Seba ey zî planê nimiteyî est ê. Sebebê bêvengîya hêrişanê nê her di taxan zî ma bi nê plananê limiteyan girêdanê.”
‘Şexsê nê taxan de wazenê estbîyayîşê şarê Kurdî orte ra wedarê’
Peynîya qiseykerdişê xo de Ehmed Xoceyî verva hêrişan no vengdayîş kerd: “Wazenê şexsê taxan de estbîyayîşê şarê kurd û projeya neteweya demokratîk orte ra wedarê. Tirkîye zî seba averşîyayîşê prosesî tasfîyekerdişê HSD’î şert nîşan dana. Bi no yew wazenê şarê kurdî bê tesîr bikerê. seba ey zî sere de pêroyî Kurdîstan û tebere welatî ma vengayîşe şarê xo kenê wa Rojava ra wayîr vejîyê û ma reyde vinderê. Ma bêveng nêmanenê. Çi destê ma ra bêro ma ma do bikerê.
Wa şarê ma zî her ca de vengê xo berz bikero. Hêrişanê taxan de gede û sivîlan kişenê. Ma heta peynî destkewteyanê xo bipawime. Hukmatê Şamî zî vera kerdişanê teberê merdimîyeyê ra mesûl o. Ganî goreyê hempeymanâ 10ê adare têbigêro. Ganî mîyanê Surîya de heme şar û neteweyî wayîrê heqî bi. Teberê nê de çareserî çinî ya. Sîstem bi yew netewe, yew dîn û yew reng nîno qebûl kerdene. Bi tehdîdanê Tirkîyazî tîya aramî nêvirazêna. Eke tîya aramî nêvirazîyo Tirkîye zî rehet nêbena. Şarê ma zî heta peynî do xover bido.
