Seyyîd Mucteba Hamaney cayê pîyê xo Elî Hamaney ke 28ê sibate de amebî kiştene ame weçînayene, la xo reyde munaqeşeyê “monarşî” ardî. Yeno vatene ke Mucteba Hamaney mîyanê hezanê rejîmî de “kesêko bihêz” o.
Meclisê Pisporan ê Îranî vizêrî saetanê şewe de rayberê xo yo newe yê dinî weçînit. Goreyê naye ra cayê Elî Hamaney ke 28ê sibate de hetê Îsraîl-DYA’yî ra ame kiştene. Lajê ey Seyyîd Mucteba Hamaney ame weçînayîş. Hamaney o ke vernî kamerayan de zêde nêaseno, Îran de sey şexsîyetêko dînî yê şiî û karakterêk sîyasî yeno vînayene.
8ê îlonî 1969î de şaristanê Meşhedî yê Îranî de maya xo ra bî. Lajê dîyine yê Elî Hamaney o. Mucteba Hamaney ke dibistanê Tehranî de perwerde dîyo, dima ra zî şaristanê Qumî yê Îranî de mîyanê sîstemê perwerdeyî yê tira vanê Hewze de ameyo perwerdekerdene, uca de derheqê Fiqih (Huqûqê Îslamî), Usûl ê Fiqihî (metodolojîya huqûqê Îslamî), tevsîr (şîroveyê Quranî), îlmê hedîsan, gramerê erebî û metnanê Îslamî yê klasîk ame perwerdekerdene.
Têkilîyê ey bi Artêşa Muhafizanê Şorişê Îranî û hezanê Besîcî reyde xurtê. Her çend vernî kamerayan de zê nêaseno zî sîyasetê Îranî de kesêko tesîrdar o. Sewbîna zî yeno îdiakerdene ke virdarnayîşê çalakîyanê badê weçînayîşanê pêroyî yê serra 2009î de Îran de amebî dest pêkerdene de rolêke gird kaykerd.
