Rayberîya Xosere ya Kobanî eşkera kerd ke dorpêçê serê şaristanê Kobanî hema zî dewam keno û Hukmatê Demkî yê Şamî şertanê peymana 29ê çele hema zî nêano ca.
Rayberîya Xosere ya Kobanî derheqê dorpêçê serê şaristanî de eşkerayîyêka nuştekî weşanaye. Eşkerayî de ame dîyarkerdene ke hukmatê demkî yê Sûrîya lazimtîyanê peymana 29ê çeleyî Kobanî û dorûverê aye de nêano ca.
‘Dorpêçê serê Kobanî dewam keno’
Goreyê eşkerayî her çend zêdeyê 50 rojî derbas bîyê zî dorpêçê serê Kobanî hîna zî dewam keno û wina ame vatene: “Înternet ameyo birnayene, şîyayîş û ameyîş yeno astengkerdene û derbasbîyayîşê sotemenî zî yeno vindarnayene. Hêzê girêdayê hukmatê demkî hîna dewanê başûrê rojhelatê Kobanî ra sivîlan remnenê heqanê Welatijan binpay kenê.”
Vengdayîşê bicaardişê peymane
Rayberîya Kobanî waşt ke Hukmatê Şamî erey nêmano, şertanê peymane bîyaro ca û nê madeyî rêz kerdî: “Ganî dorpêç bilez û pêroyî bêro wedaritene. Vera taybetmendîya îdarî û kulturî ya herême û nêzdîbîyena şarê herême rê rêz bêro girewtene û lazimtîyê peymana 29ê çele bilez bêrê caardene.”
‘Gamê Şamî vera şertanê peymane yê’
Eşkerayî de ame vatene ke tayînkerdişê berpirsan teberê herême ra hetê hukmatê Şamî ra benê, vera şertanê peymane û îradeyê şarê herême yê. Rayberîya qetî kerd ke şarê kurdî Sûrîya de bi hezaran şehîd û qurbanîyê girsî dayê ke heq û îradeyê xo bipawê.
‘Tekrarkerdişê rejîmê verênî probleman çareser nêkeno’
Rayberîya Kobanî hişyar kerd ke tekrarkerdişê metod û sîyasetê rejîmê verênî do probleman çareser nêkero. Eşkerayî de ame dîyar kerdene ke awankerdişê Sûrîya newî tena bi beşdarîyê heme temsîlîyetanê welatî eşkeno virazîyo. Rayberîye peynî de vengda dewletanê garantor ke berpirsyarîya xo bîyarê ca û tedaya serê hukmatê Şamî de bikerê ke wa şertanê peymane bilez bîyaro ca.”
