Raybero verên ê CIA’yî David Petraeus vat ke hêrişî eşkenê programê fuzeyan ê Îranî yan zî hêzanê leşkerî bikero hedef û dîyar kerd ke hêrişê leşkerî do tesîrêko bisînor rejîmî Îranî ser o bikerê.
Kaoso mabênê Îran û Dewletanê Yewbîyayeyî yê Amerîkayî (DYA) de çiqas şino zêdetir beno. Raybero verên ê CIA’yî David Petraeus da zanayene ke hêrişê DYA’yî yê vera Îranî mumkum nîyo ke rejîmê Îranî bido vurnayene.
Petraeus 22ê sibate 2026î de tewrê programêkê radyoyî yê Amerîkayî bi û îfade kerd ke heta operasyonêk leşkerî yê girdî zî do tena tesîrêko bisînor serê rejîmê Îranî de bikero.
‘Alî Hamaney hedre nîyo ke tawîzan bido’
Goreyê Petraeusî rayberê dînî yê Îranî Alî Hamaney sey îdeologêkî şîdetî maneno, bi taybetî zî hedre nîyo ke babeta nukleerî de tawîz bido. Nê vatişî wextê dayîşûgirewtişan de ke mabênê rayedaranê Amerîka û Îranî de programê nukleerî ser o dewam kerdêne, ameyê vatene. Serekê Amerîkayî Donald Trump, her çiqas bi hewayêko pêroyî berî dîplomasî rê akerde verdabî zî, eynî wextî de dîyar kerd ke eke dayîşûgirewtişî sernêkewê, ê do estbîyayîşê leşkerî yê Amerîkayî Rojhelatê Mîyanênî de xurtêr bikerê.
‘Hûmara qirkerdeşê çalakîkeran ê Îranî nêzdîyê rastîye yê’
Trump bêmabên veng dano Îran ke seba peymanêka başêre dayişûgirewtişan bikerê. Trump sewbîna zî behsê hûmara 32.000 çalakîkeran keno ke yeno îdiakerdene Îran de ameyê kiştene. Na hûmare her çiqas ameyba texmînkerdene zî rastî ra dûrî nîya.
Petraeusî dîyar kerd ke nakokîyê mabênê Îran û hemkarê înan Amerîkayî de herême de, bi taybetî seba Îsraîl endîşe virazeno. Ey sewbîna bale ante paştîdayîşê grûbanê çekdar ê sey Hîzbûllah, Hamas, Husî û milîsê şiî yê Îraqî ser o. Goreyê erjnayîşan, vindertişê xo de israrkerdiş Îranî do mabênê Îran û Amerîka de bibo sebebê mudaxaleyê leşkerî.
