Serrêk şehîdbîyayîşê rojnameger Azîz Koyluogluyî ser ra vîyareno. Ey 32 serrî bi çimanê kamera û qelema xo vera îşxalkeran, nêheqîye û zulmî şer kerd.
Rojnameger Azîz Koyluoglu ke hêrişê dewleta tirke de şehîd bî, 32 serranê cuya xo her beşê erdê Kurdîstanî de seba roşnîkerdişê raştîyan û gêrayîşê heqîqetî vîyarna.
Azîz Koyluoglu serra 1976 de taxa Çinar a Amedî de keyeyêko welatperwer de ameyo dinya. Mîyanê keyeyêkê welatperwerî de, bi kulturê xoverdayîşê Şêx Seîdî û Mezlûm Doganî girs bî. Coka hema ciwanîya xo de raştîya kurdan û Kurdîstanî nas kerd, kewt peyê gêrayîşê heqîqetî.
Sey her kurdo welatperwer, o zî kewt rayîrê heqîqetî ser, dewa xo de dest bi têkoşînê cuye kerd. Seba xebat û têkoşînê xo çend rey kewt heps. 16 serrîya xo de bi îşkence û zordestîya dewleta tirke reyde rî bi rî ame. La ey qerarê xo yê cuyêka azade rew dabî û cewabê ey girskerdişê têkoşînî bî.
Koyanê azadan ra peyê heqîqetî de
Serra 2000î de Azîz Koyluoglu, sey rojnameger û gêrayoxê raştîye, Herêmanê Pawitişê Medyayî de, herêmanê Qendîl, Xakurke, Xinêre de têkoşîn û cuya endamanê Têgêrayîşê Azadîye bi dîmen, resim û nuşteyan resna raya pêroyîye.
Wexto ke Rojawan de Şorişê 19ê Temmuze (2012) dest pêkerd, ey zî serra 2013î de verê xo da warê şorişî. Zaf bajar û dewanê Kurdîstanê Rojawanî ra gêreno, nas keno û şorişî resneno dinya.
Efrîn, Girê Spî û Serêkanîye de…
Serra 2018î de wexto ke dewleta tirke hêriş kerd Efrînî ser, Azîz zî bêşik verê xo da Koyê Kurmênc û xoverdayîşê serdemî ke 58 rojî dewam kerd, teqîb kerd. Serra 2019î de wexto ke dewleta tirke hêriş kerd Girê Spî û Serêkanîye ser zî Azîz uca de bî.
Mamostayê rojnamegeran bî
Azîz Koyluoglu seba perwerdeyê rojnamegeran bîbî bingeyanê Resnayîşê Azadî ra yew. Bi desan rojnamegerî perwerde kerdî.
Rojnameger Azîz Koyluoglu 27ê çeleyê 2025î de dewa Girdecan a nêzdîyê şaristanokê Çarqûrne yê qezaya Ranya de netîceya hêrişê dronanê Tirkîya de ame qirkerdene.
