Kampanyaya “Roja Sêşeme Darderdişan rê Nê” eşkera kerd ke mîyanê 25 rojan de 271 kesê rojhelatê Kurdîstan û Îran de ameyê dardekerdene. Sazgehanê mîyanneteweyî ra ame waştene ke bibê vengê girewteyanê kurd û Îranî.
Kampanyaya “Roja Sêşeme Darderdişan rê Nê” hewteyê 99. de vera cezayanê dardekerdişî yê Rojhelatê Kurdîstan û Îranî de eşkerayîyêk vila kerde.
Eşkerayî de ame dîyarkerdene ke 25 rojan de 271 kesî rojhelatê Kurdîstan û Îran de ameyê dardekerdene. Ameyo vatene ke kesê ke ameyê dardekerdene, bêyî ke mehkemayêk bi hewayêko dadmend bêrê muhakemekerdene û avûkatê pawitişê înan bikerê, ameyê dardekerdene.
Eşkerayî de ameyo vatene ke mîyanê nê hewteyî de girewteyo sîyasî yê bi nameyê Ramîn Zile ke şarê qezaya Nexede ya Ûrmîye yo, hetê Şubeyê Mehkemaya Şorişî yê Mehabadî yo Yewin ra cezaya dardekerdişî ey rê ameya dayene.
Eynê wextî de ame vatene ke hetê Şubeyê Mehkemaya Şorişî ya Tehranî yo 26. ra cezaya dardekerdişê seba şeş girewteyanê sîyasî rê ameya dayene ke hepisxaneyê Qizilhesar de manenê.
Peynîya eşkerayî de seba şarê Îran û sazgehanê mîyanneteweyî vengdayîş ame kerdene ke bibê vengê girewteyanê ke cezaya dardekerdişî înan rê ameya dayene û piştgirîya girewteyan bikerê.
