Mamosteya dibistana verêne Furug Husrevî ke şaristanê Behbahanê Îranî de ciwîyena, aye rê15 serrî cezaya hefsî ameye dayene.
Mamosteya dibistana verêne Furug Husrevî ke Behbahanê eyaletê Huzistanê Îranî de ciwîyena, bi îdiayê “Propagandaya hemverê rejîmî”, “Heqaretê hemverê Alî Hamaneyî”, “Heqaretê hemverê Humeynî”, “Heqaretê hemverê dînî” û “Sazgehê medyayanê ke girêdayeyê Îsraîlîyî, înan reyde têkilî ronaya”, bi pêroyî 15 serrî cezaya hefsî aye rê ameye dayene.
Qerarê ke derheqê Furug Husrevî de ame dayene, Şubeyê Dadgeha Şorişî ya Behbahanî ya 1. ra ameyê eşkerakerdene. Goreyê madeyê 134. yê qanûnê cezaya Îslamî ya Îranî, cezaya tewr giran ke 5 serrî cezaya hefsî ya, do bêra caardiş.
Roniştişê dewaya ke Furug Husrevî ameye muhakemekerdiş, 2ê teşrîna peyêne de ame kerdiş, qerar 3ê teşrîna peyêne de mamoste reyde ame parekerdiş.
Verê zî ameye girewtiş
Furug Husrevî serê sibayê 30ê hezîrana 2024î de di cinîyan reyde, hetê 6 sîxuranê Îstixbaratê Muhafizê Şorişî ra bê agahîdayîşî, sereştişê keyeyî de ameye destbendkerdiş, cigêrayîşê keyeyî de dest da çîyê şexsî û telefonê înan ser o.
Mamoste dimayê 29ê tebaxe newe ra ameye destbendkerdiş û 8ê tebaxe de bi kefaletê 2 mîlyar tûmenî Hepisxaneyê Sepîdarî yê Abhazî ra ameye veradayîş.
Daîreyê Cipersayîşî yê Dozgerîya Şorişî û Pêroyî ya Behbahanî yo Şubeyê 2. de 21ê êlula 2024î de derheqê Furug Husrevî de gerre kerdbî.
Ame dîyarkerdiş ke Furug Husrevî, dimayê protestoyanê serra 2009î, unîversîteya Bender Îmam Payam-e Nurî ra ameya eştiş.
