Rejîmê Îranî seba dîmen û agahîyê girdbîyayîşê serewedaritişê şaran vila nêbî, pêroyê welatî de torê înternetî bi temamî birnayê.
Îran de vizêr zî serewedaritişê şaran roja 12. de dewam kerd. Şewa 9ê çeleyî de beşdarîya şarî vejeye asta tewr berze û goreyê agahîyanê ke rêxistinanê heqanê merdiman û çimeyanê herême ra ameyê girewtene, çalakî 11 şaristanan ra vila bîyê. Sewbîna vizêr pêroyê roje de zî pêroyê Îranî de esnafan dikanî girewtê.
Rejim nêwazeno Îran ra agahî bêro girewtene
Rejîmê Îranî ke bi şîdet, destbendkerdiş û dardekerdişan ra nêeşkeno vernîya serewedaritişê şaran bigîro, cehd keno ke vilabîyayîşê agahîyan asteng bikero. Ame zanayene ke rejîmî bi amancê astengkerdişê agahîyan û dîmenanê serewedaritişî pêroyê welatî de torê înternetî birnayê.
Çapemenîya rejîmî serewedaritişî nêvînena
Destpêkê serewedaritişî ra heta nika çapemenîya rejîmî behsê serewedaritişî nêkerdo û averşîyayîşan pare nêkenê. Rixmo ke serewedaritiş ameyo asta binvistişê rejîmî zî çapemenî herinda dayîşê rastîyan ra muracatê manîpulasyonî kena. Serewedaritiş heta nika tena bi xeberanê ke şar û çalakîkerê ke sey sîxûranê Îsraîl û DYA’yî mojnenê, ameyê weşanayene.
Vegdayîşê ‘vengê ma bieşnawê’
Astengkerdişê toranê çapemenî ser o rêxistinê komelkî û heqanê merdiman vengdayîşê hessasîyetî kerd û waşt hemverê birnayîşê toranê înternetî her kes vengê şaranê Îranî û serewedaitişê şaran zafêr bivîno.
