Rejîsor Kerem Tekoglu yo ke bi nameyê ‘Keremo’ yeno şinasnayîş, hetê polîsanê Îstanbulî ra 11 kesanê bînan reyde ame tewqîfkerdiş. Bi îdîaya ke nê kesî ‘endamê rêxistina terorî ya çekdare’ yê ameyê tewqîfkerdiş.
Kerem Tekoglu ke tewr peynî yew belgefîlmo muhîm viraştbi, nika ameyo tewqîfkerdiş. Belgefîlmê ey ‘Mamosteyo Bêmamosta’ ke derheqê cuya zanyar û nuştoxê namdarî Dr. M.Malmîsanijî de yo, çend rojan ra ver Youtubeî ser o amebi parekerdiş û zaf eleqe dîyabi ci. Belgefîlm verê cû Îstanbul û Amed de amebi mojnayîş.
Tekoglu bi îdîaya ke eleqeyê xo şaredarê Esenyurtî yo tewqîfkerde Ahmet Ozerî reyde est o, ameyo tepiştiş. Avûkatê ey Suphî Ozgenî medyaya sosyale ra xebere daye û va ke qeraro ke dadgeha cezaya sulhî dayo, qet huqûqî nîyo. Ozgenî va ke mîyanê 12 kesanê ke amebî tepiştiş, înan ra tena yew kes kontrolê adlî ra ameyo verdayîş.
