Sekreterê Pêroyî yê GMB’yî Gary Smithî resepsîyonê Newroze yê Parlamentoyê Îngilîstanî de pare kerd ke ê do paştdayîşê Hemleya ‘Abdullah Ocalanî rê Azadîye’ rê dewam bikerê.
Bînaya Parlamentoyê Brîtanya de resepsîyonê Newroze ame kerdene. Vervatoxê Parlamentoyî Sir Lindsay Doyleyî meymandarîye kerde. Resepsîyon hetê Kurdish Progressî ra ameyo amadekerdene. Xeylê wekîl, sîyasetmedar, akademîsyen ûsn. tewrê resepsîyonî bîyî.
Sekreterê Pêroyî yê Sendîkaya GMB’yî Gary Smithî resepsîyon de qisey kerd. Smithî dîyar kerd ke bi serran o sendîka paştî dana şarê kurdî û vat: “500 hezar endamê ma est ê. Ma endamanê xo reyde do tim paştî bidê ‘Hemleya Abdullah Ocalanî rê Azadîye.’”
Sekreterê ASLEF’î Mick Whelanî zî vat ke ganî şarê kurdî qederê xo tayîn bikerê û ê seba ney do tim paştî bidê kurdan.
Temsîlkaranê çar parçeyanê Kurdîstanî û sîyasetmedaranê îngilîzan zî resepsîyon de qisey kerd.
Wekîla parlamentoyî û Wezîra Teknolojî Feryale Clarka ke kurdêka elewî ya zî beşdarî selam kerdî û mesajê paştdayîşî dayî.
Temsîlkarîya Meclîsê Sûrîyeya Demokratîke (MSD) zî bale ante qewimîyayîşanê Rojawan û Sûrîye ser.
Resepsîyon bi mesajanê paştdayîşî qedîya.
