Goreyê melumatanê Rêxistina Efî ya Mîyanneteweyî hedîseyê kiştişê ke bi taybetî kêm-netewanê elewîyan hedef gênê, qewimîyayê.
Rêxistina Efî ya Mîyanneteweyî dîyar kerd ke hedîseyê ke herêma qeraxê Sûrîye de ameyê meydan, sey “sucê şerî” pênase kerd û ard ziwan ke berpirsîyarê nê sucan Heyet Tahrîr el-Şam (HTŞ) o.
Goreyê raporê rêxistine hêzanê HTŞ’yî mabênê 8-9ê Adara 2025î de şaristanê qeraxî Banyas de 100 vêşêr kesî kiştê. Rêxistine dîyar kerd ke 32 hebî hedîseyê kiştişê ke bi taybetî elewîyan hedef girewtê, vejîyayê orte.
Tayê şahîdê çiman ke Rêxistina Efî ya Mîyanneteweyî rê qisey kerd wina vat: “Kesê çekdarî qurbanîyan ra persayêne ke elewî yê yan ney dima ra ê tehdît kerdêne û kiştêne. Tayê qurbanî sey berpirsîyarê sucê ke rejîmo verên kerdê, înan ra berpirsîyar dîyêne.”
Rêxistine sewbîna dîyar kerd ke hêzê zordarî nêverdenê ke keyeyê seba merdimanê xo yê ameyê kiştene, merasîmê hewanayîşî bikerê. Hêzî zor danê keyeyan ke meytan dekerê mezelanê pêserkerdeyan. Rêxistine dîyar kerd ke no zî îhlalkerdişê heqanê qurbanîyan û keyeyan o.
Sekretera Rêxistina Efî ya Mîyanneteweyî Agnes Callamard dîyar kerd ke sucê winasînî resayê asta “sucê şerî” û wina vat: “Ganî kesê ke nê qetlîaman ra berpirsîyar ê hesab bidê. Çinbîyayîşê edaletî beno ke Sûrîye ver bi wehşetêko newe ra bero. Wezîfedarê hukmatê neweyî ganî bendanê xo demê verêne reyde birnê û seba ke vera nê sucan qet nerm nêzdî nêbê ganî qurbanîyanê nê sucan rê rastîyan û edaletî pêşkêş bikerê.”
