Çalakîyanê şar ê vera krîzê aborî û zordestîya rejîmê Îranî 8 rojî xo ra pey verdayê. Çalakîker û analîstê sîyasetî Rezgar Rawahanî derheqê amancê çalakîyan de dîyar kerd ke ê cigêrayîşê edalet û awankerdişê sîstemêko demokratîk mojnenê û vat: “Cinî û ciwanî pêşengîya çalakîyan kenê.”
Şarê Îran û Rojhelatê Kurdîstanî 8 rojî yo vera krîzê aborî, zordestî û bêedaletîye kuçeyan de çalakîyan kenê. Nê çalakîyan de tewr kêm 582 çalakîkerî hetê hêzanê rejîmê Îranî ra ameyê destbendkerdene, tewr kêm 18 çalakîkerî ameyê kiştene. Çalakî û serewedaritişê şarî şaristanan de benê bila. 3 serrî ra ver zî bi pêşengîya cinîyan bi sloganê “Jin Jîyan Azadî” serewerdaritişî aver şîbî û heme ca de vila bîbî. Heta nika xeylê derûdorî paştî daya nê çalakîyan. Çalakî her ke şonê pêroyê Îranî de vila benê.
Çalakîker û anlîstê sîyasetê Rezgar Rawahanî amancê averşîyayîşanê Îran û Rojhelatê Kurdîstanî ser o vindert û dîyar kerd ke nê çalakî û nerazîbîyayîşê şarî, bi sînordarkerdiş û girewtişê vernîya azadîya sîvîl û sîyasî, rişwetê hîra ê zereyê awanîyanê hukmatî de û tedayanê giran ê aborî reyde girêdaye yê û wina vat: “Ê venganîya xorîn û kronîke mabênê waştişanê rastîn ê şar û cewabê şarî mojnenê; venganîyêka komelkî ke her ke dergêr dewam bikero û hîna zaf bêro peygoşkerdene, potansîyelê nerazîbîyayîşo kolektîf hende pîlêr beno. Heto bînî ra cewabê qelskerdişî û sînordarkerdişî hemverê çalakîkeran tena bi demkî vengê şarî bêveng nêkenê eynê wextî de eşkenê vernîya vêşbîyayîşê nerazîbîyayîşanê çalakîkeran akerê. Îmtîhanê verênî sey hîrê serranê vîyarte yê têgêrayîşê Jin, Jîyan, Azadî Îran û Kurdîstan de nêeşkenê dînamîzmê çalakîker û têkoşînanê komelkî bi domdarî vindarnê.”
‘Sebebê çalakîyan krîzê aborî yo’
Rezgar Rawahanîyî dîyar kerd ke çalakîyî girêdayeyê krîzê aborî yê û wina vat: “Seba ke tedaya malî, enflasyon, bêkarî û kêmbîyayîşê hêzê herînayîşî, cuya rojane ya merdiman ser o tesîr kerdê. Giranîya krîzê aborî riyê rişwet, polîtîkayanê nearam û cezayan o ke hêzê hukmatî yê cewabdayîşê hewcedarîyanê şarî sînordar kerdê. Bêguman tarzê rayraberdişê Komara Îslamî ya Îranî sebebo sereke yê heme krîzanê nikayînan o. Nêzdîbîyayîşê hukmatî zafane ewleyî û qelskerdişî ser o yo. Hukmat hewl dano ke şuxulnayîşê hêzanê ewleyî û qelskerdişî, sînordarkerdişê resnayîşî, girewtişê bi hewayêko sîstematîk ê çalakîkeran û tedaya medya reyde çalakîyan kontrol bikero. Eynê wextî de hewl dano ke waştişanê çalakîkeran bi çalakîkeranê welatanê xerîb reyde neqanûnî bikero ke no sîyasetêko kehen û bêtesîr o.”
Zafêrê 600 kesî ameyê girewten
Rezgar Rehewanîyî derheqê hûmara girewtiş û mergan de agahî dayê û wina vat: “Destpêkê çalakîyan ra riyê agahdarîya fermî ya sînorkerda û sansurê medya hûmara rast dîyar nîya la goreyê raporanê rêxistinanê heqanê merdiman û medyaya namdare hûmara girewteyan zafêrê 600î ya û na hûmare vêşî bena. Heta nika tewr kêm 18 kesî ameyê kiştene, zafaneyê înan şaristananê Îlam û Kirmanşan yê Kurdîstanî ra yê.”
‘Pêşengê çalakîyan cinî û ciwan ê’
Rezgar Rawahanîyî bale ant emrê çalakîkeran ser o û nê agahîyî pare kerdê: “Kesê ke beşdarê nê çalakîyan benê zafane ciwan, wendekar û cinî yê ke cîyakarî, rişwet û tedaya aborî ra razî nîyê. Sloganê sey, ““Mirin ji bo Komara Îslamî” û “Mirin ji bo zalim, çi Şah (Reza Pehlewî) be çi Rêber (Haley Khamenei)” yenê vatene ke waştişê înan o sereke reformo şenik nîyo, bedilîyayîşêko bingeyîn ê îqtîdar û qedînayîşê her tewir zordarîye yo. Çalakîyî ke dewam kenê eşkenê, aramîya sîyasî û komelkî ya hukmatê Îranî binfînê û waştişanê şarî her wextî ra zafêr seba azadîye, edalet û aborî roşnî bikerê. Eke no têgêrayîş dewam bikero beno ke ma Îran de bedilîyayîşanê awanî û rastînan bivînê.”
