Rojawanij Emîra Er ke sînorê Nisêbîn-Qamişlo de nobed gêna vat ke a sînorî ra seba hetkarî nê, seba wayîrvejyayişî ame ya û dîyar kerd ke heqê senî ke her kesî xobixo îdarekerdiş esto, heqê Kurdan zî esto
Çeteyê SMO’yî ke girêdaya Tirkîya yê, hêrişê Sûrîyeya Bakûr û Rojhilatî kenê, verba nê hêrişan zî sînorê Nisêbîn-Qamişlo de çalakîya nobedî destpê kerda. Emîra Er rojawanij a û serra 1997î de bi rayîrê zevajî ameya Dêrikê Mêrdînî.
Rojawanij Emîra Er ke nobedî ra beşdar bîya wina vat: “Ma herra, awe û şarê xo reyde yew ê. Rojawan parçeya ganî ma ya. No ser çew nêeşkeno Rojawan ma ra biqefelno. Nê herrayê, herraya pîy û bawkalanê ma yê. Dinya de demokrasî û yewîye wina nîyo. Eke şima birayî ra behs kenê, senî keyeyê şima weş o, keyeyê ma zî wina weş o.”
Xobixo îdarekerdiş heqê ma zî yo
Emîra Er eşkera kerd ke nika Rojawan de heme şar xover danê, çimkî wazenê xobixo îdare bikê û wina domna: “Ganî no ser Rojawan de Surîye ra cîya meclîsêk bibo. Wekîlanê ma zî bibê. No pergal tena seba ma nê, heme şaran ra vîyarte yo.”
Emîra Er Nisêbîn ra Qamişlo ewnîya û ristayê na şîîrî ard ziwan:
“Welatê min, welatê min
Her hilmeke bistînim ji gûl û beybûnên te
Her firek av vexwim ji çem û kaniyên te
Her seyranekê ez derkevim di nav deşt û çiyayên te
Her nêrîneke binihêrim tenê li ser erdê te
Hêja ye ez hezar cara şehîd herim ji bo te.”
