Rojnamegero Belçîkayij Chrîs Den Hond o ke seba pîrozbayîyanê Newroze û hedîseyanê sîyasî taqîb bikero ame Tirkîya, Teyaregehê Stenbolî de ame teberkerdene.
Rojnamegero Belçîkayij Chrîs Den Hond o ke Fransa de maneno, seba ke hedîseyanê sîyasî û pîrozbayîyanê Newroze taqîb bikero vizêr ame Stenbol. Chrîs Den Hond vizêr wexto ke teyaregehê Stenbolî de teyara ra ame war, hetê polîsan ra ame vindarnayene û polîsan o berd qereqol. Polîsan bi manaya ke “Ti lîsteya sîya de ca gênê û ameyîşê to yê Tirkîya qedexe yo” o deport yanî Tirkîya ra teber kerd.
Chrîs Den Hond bi vîdeoyêk prosesê teberkerdişê ard ziwan û dîyar kerd ke ameyîşê ey yê Tirkîya ame qedexekerdene û reya ewil a ke çîyêko winasîn ciwîyeno. Chrîs Den Hond da zanayene ke tu belgeyêko fermî yê qedexeyê seba ey nêameyo mojnayene û meslegê ey o rojnamegerî ameyo astengkerdene. Chrîs Den Hond vat ke ameyîşê ey o Tirkîya seba 10 serran ameyo qedexekerdene.
Chrîs Den Hond serranê verînan de zî zaf reyî ameyo Tirkîya û pîrozbayê Newroze taqîb kerdê. Eynê wextî de Chrîs Den Hond zaf reyan zîyaretê Rojawanê Kurdîstanî kerdo û hedîseyê ucayî taqîb kerdê.
Chrîs Den Hond dîyar kerd ke seba o şîyo Rojawan û Kobanê û tewrê pîrozbayîyanê serrgêra xelesnayîşê Kobanê bîyo, ameyîşê ey o Tirkîya ameyo qedexekerdene.
