Rojnameger Kakshar Oremarî dîyar kerd ke badê destpêkerdişê hêrişanê vera Îranî Rojhelatê Kurdîstanî de rewşêka awarte est a û vat: “Rejîmê Îranî seba îtîfaqê mîyanê kurdan de tengijyayo. Amerîka û Îsraîl zî hêzê kurdan ra haydar ê û zanê ke hêzo tewr xurt kurd ê.
Rojnameger Kakshar Oremarî îfade kerd ke vurîyayîşê rejîmî do Kurdîstanî ra dest pêbikero.” Oremarî vat ke şar wayîrê hêzî yo la Îsraîl û Amerîka ra bawer nêkeno.
‘Şerê enerjî û vurîyayîşê konjonktûrê sîyasî yo’
Oremarî vat ke hedefê hêrişan vindarnayîşê vilabîyayîşê uranyomî û fuzeyanê balîstîkan o û reqabetêko gird mîyanê Amerîka, Rusya û Çînî de est o. “Mudaxeleyê Îranî yê Iraq, Sûrîye, Urdun, Libnan û Erebîstana Suudî ser o seba Amerîka û Îsraîlî tehdîd bî. Badê girewtişê Neqebê Hurmuzî enerjî dinya giranêr bîye.”
‘Hedefê Îsraîlî vurîyayîşê jeopolîtîkaya herêm o’
Oremarî vat ke Îsraîl wazeno jeopolîtîkaya herême bivurno û no Tirkîya ser o zî tesîr keno. “Îran de zaf milet û endamî est ê û hêzo tewr xurt kurd ê. Verê destpêkerdişê hêrişan de partîyanê kurdan yewbîyayîşê xo îlan kerdbî û no Îranî rê talûke ameybî dîyene.”
‘Herêma yewine ke azad bibo Rojhelatê Kurdîstanî yo’
Oremarî vat: “47 serrî yo ke kurdan hemverê rejîmî serê xo nêrona. Eke siba rejîm birijîyo rolo tewr gird do bibo yê partîyanê kurdan. Herêma yewine ke azad bibo Rojhelatê Kurdîstanî yo, çunke yew hetî de Başûr, yew hetî de Vakur û hetê bînî de zî Rojava piştîya înan de yê.”
‘Bawerîya şarî Amerîka û Îsraîlî ra çin a’
Oremarî vat ke Rojhelatê Kurdîstanî de rewşêka awarte est a şar yew hetî ra keyfweş o ke rejîm rijîyeno la hetê bînî ra zrodayîşê rejîmî kurdan ser o zaf zêde bîyo, înternet ame birnayene û zaf kesî ameyê destbendkerdene. “Bawerîya şarî Amerîka û Îsraîlî ra çin a. La komel hemverê Îranî de bihêz o.”
‘Projeya Netewa Demokratîke çareserî ya’
Oremarî peynî de vat ke hemverê krîz û kaosê Rojhelatê Mîyanênî de sîstemo tewr aktuel ê çareserkerdişî sîstemê Netewa Demokratîk a ke Birêz Ocalan pêşnîyaz keno.
