Salih Muslîmî dîyar kerd ke hêrişê vera taxanê kurdan û Dêr Hafirî bi piştgirîya Tirkîya yenê kerdene û vat: “Dêr Hafir seba ma cayêko stratejîk o. Do HSD uca veranêdo.”
Çeteyê HTŞ û SMO’yî taxanê Şêxmeqsûd û Eşrefîye ra pey nika zî hêrişê Dêr Hafir û derûdorê Awbendê Tişrînî kenê.
Endamê Konseya Hemserekîya Partîya Yewîya Demokratîk (PYD) Salih Muslîm derheqê hêrişanê vera Vakur û Rojhelatê Sûrîye de Ajansê Mezopotamya rê qisey kerd.
‘Tirkîya û rejîm pîya hêriş kenê’
Salih Muslîmî dîyar kerd ke rewşa Vakur û Rojhelatê Sûrîye dîyar nîya û vat ke dimayê çîyanê ke Şêxmeqsûd û Eşrefîye de qewimîyayê, şar zaf hêrs bîyo û reaksîyon mojneno. Muslîmî sewbîna behsê amadekarîya hêrişê vera Dêr Hafirî zî kerd û vat: “Tirkîya û rejîmê Şamî pîya xebitîyenê. Dewê Dêr Hafirî yenê topbarankerdene. Eynê wextî de Awbendê Tişrînî ser o zî hêrişî est ê. Nê semedî ra rewşeka têmîyankewta est a û ma nêzanê do senî bibo.”
‘HSD do Dêr Hafir de şer bikero’
Salih Muslîmî îfade kerd ke ê do bi her hewayî vera dişmenanê xo bipawê û vat: “Dêr Hafir seba ma cayêko stratejîk o. Ez nêfikirîyena ke HSD bi asanî uca verado. Şêxmeqsûd herêmêka şenik bîye û uca de HSD ra kesêk çin bi. Tena hêzê ewleyî est bîyê. La cayanê bînan de HSD est o û do şer bikero.”
