Salîha Aydenîza ke nobeta sinorê Qamişloyî de qisey kerd wina vat “Eke proses do dest pêbikero, ganî bi naskerdişê statûyê şarê Kurd ê Rojawanî bibo. Mimarê sîstemê Rojawanî zî Ocalan o.”
Vera hêrişanê Tirkîya û SMO’yê ke Vakur û Rojhelatê Sûrîye ser o dewam kenê, nobeta qezaya Nisêbîn a Mêrdînî de sinorê Qamişloyî de roja 18. de dewam kena. Şarê ke saetanê serê sibayî de yenê cayê nobetî, bi slogananê “Bijî berxwedana Rojava” û “Bijî berxwedana gelê Kurd”î û bi pankaratê ke ser o “Şerî rê nê” nusîyayo, nobetî dewam kenê. Wekîla DEM Partî Salîha Aydenîz, Kamuran Tanhan û Sînan Çiftyurek zî beşdarê nobetî bîyî.
Nobetî de pankartêko ser o “Bi ruhê seferbertî ma do Şorişê Rojawanî bipawê” nusîyayo û tabelayê ke ser o “Bijî Şorişê Cinîyanê Rojawanî”, “Bijî şarê Rojawanî” nusîyayo ameyê tepiştiş.
‘Kurdî seba çareserî amade yê’
Wekîlê Wanî yê Dem Part3i Sînan Çiftyurekî wina vat: “Heta ke faîlê qirkerdişê Roboskî nêrê mehkemekerdiş, wa kes qalê demokrasî nêkero.” Çiftyurekî rojnamegerê ke ameyê qetilkerdene Nazim Daştan û Cîhan Bîlgînî vîr ardê û wina dewam kerd: “Ê vengê heqîqetî bîyê. Nika Rojhelatê Mîyanên de prosesêko newe destpêkeno. Bê Kurdan, Rojhelatê Mîyanên de azadî û demokrasî nêbena. Senî ke rejîmê Esadî kewt, heme zalimî do bikewê. Kurdî dewleta unîter qebul nêkenê. Tu şarê Sûrîye dewleta unîter qebul nêkeno. Coka çareserîyêko daîmî Sûrîye de awanbîyayîşê sîstemêko federal o. Coka ganî Rayberîya Xoser a Demokratîke bêra şinasnayene. Heme bawerî û şarî Rojawan de seyyewbînan ê. Eke şima çareserîyêka daîmî wazenê, biewnîyê sîstemê Rojawanî. Eke Tirkîya wazena Rojhelatê Mîyanên de dewletêka bihêz ba, ganî bizano ke bê Kurdan nêbena. DEM Partî şîye Îmralî û Ocalanî reyde qisey kerd û vatişê xo yê derheqê çareserî de vatî. Şarê Kurd seba çareserî amade yo.”
‘Ganî statuyê Kurdan bêra naskerdiş’
Dima Wekîla Mêrdînî ya DEM Partî Salîha Aydenîz qisey kerd û îfade kerd ke seba ke prosesêko newe dest pêbikero ganî hêrişê ke Rojawanî ser o benê vindê û wina va: “18 rojî yo ke ma sinorê Nisêbîn-Qamişloyî de nobeta edalet û azadîye gênê. Bê ke îradeya şaran bêro naskerdiş çi hêz çi dewlete nêeşkenê netîce bigêrê. Seserrî yo ke sîstemê dewleta neteweyî Rojhelatê Mîyanên kerdo gola gonî. Coka Sûrîye de, Rojawan de ganî vera dewleta neteweyî dewletêka demokratîke bêro pawîtiş. Eke Rojhelatê Mîyanên de se serrî yo şer nêvinderto, sebebê ci no sîstemê dewleta neteweyî yo. Eke proses do dest pêbikero, ganî bi naskerdişê statûyê şarê Kurdî yê Rojawanî bibo. Rojawan de vindertişê cinîyan seba heme dinya nimûne yo. Mimarê sîstemê Rojawanî zî Ocalan o. Ma zî do seba aştî û azadîye têkoşînê xo bikerê.”
Beyanat bi sloganan qedîya.
