Parlamentera Mardînî Salîha Aydenîz, ke sinorê Rojawa de nobete de ya, Ajansa Welatî rê derheqê qetilkerdişê Sakîne Cansiz û embazanê aye de qiseykerdişêko hîra kerd.
Aydenîz bale ant serrgêra qetilkerdişê cinîyanê têkoşeran ser o û polîtîkayê dewlete rexne kerdî.
‘Qetilkerdişê cinîyan eynî aşme de û bi eynî mantiqî bîyê’
Aydenîz qiseykerdişê xo de ard ziwan ke des serran ra ver Sêvê, Pakîze û Fatma Sîlopî de, yewendes serran ra ver Sakîne, Fîdan û Leyla Parîs de û di serran ra ver zî Evîn Goyî ameyî qetilkerdene. Aye va: “Pêro eynî aşme de ameyî qetilkerdiş û pêro cinî yê. Wexto ke ma nê hetî ra biewnê tira, sîstemê dewleta xosere çi wazena saz biko, çi wazena bido vernîya xo, o yeno fehmkerdiş.”
‘Waştişê çareserî de samîmî nîyê’
Parlamentere Aydenîz bale ant ke 2013 de wexto ke Sakîne, Leyla û Fîdan ameyî qetilkerdene, dewlete waştêne prosesêk bido destpêkerdene. Aydenîz va: “Esasê xo de peyamê çaresernêkerdişê problemê şarê Kurdî bî. Yew hêl de vatêne eya ma wazenê problemî çareser bikê, hêlo bîn de zî nê hîrê embazê cinî semedo ke seba têduştî, semedê azadî, semedê ameyoxê cinîyan û şarê xo têkoşîn da, ameyî qetilkerdiş.”
‘Polîtîkaya dirîyîne ewro zî dewam kena’
Aydenîz îfade kerd ke polîtîkaya dewlete ya dirîyîne ewro zî dewam kena û va: “Ewro zî yew hêl de vanê ma wazenê problemî çareser bikê la yew hêl de zî her roje operasyonê sîyasî, her roj şerê hemverê Rojawa û polîtîkayanê qeyyuman dewam kenê. Yanê esasê xo de sîstem wazeno xetimîyayîşê xo pê qetilkerdena cinîyan, qetilkerdişê waştişê azadî, wazenê ser xêz bikerê.”
‘Têkoşînê cinîyan ra hêz gênê’
Parlamentere dewam kerd: “La ê zî bizanê ke cinî bi qetilkerdiş, bi tepîştiş fek têkoşînî ra nêverdanê, cinî hemverê tundîye de hertim vindertî û waştişê xo yê azadî ra fek nêverda. O semed ra ma cinîyê ke mîyanê kuçeyan de, mîyanê sazgehan de xebatîyenê, ma siûdê xo, ma hêzê xo, ma felsefeyê xo û rexistinkerdişê xo înan ra gênê.”
‘Çiqas biwazê ma pey de bidê zî, ma hîna zêde wayîr vejîyenê’
Aydenîz bale ant ke sistemê pederşahî nêeşkeno cinîyan pey de bido û va: “Belkî sîstem belkî hişmendîyê pederşahî wazeno ke ma cinîyan qetil biko, ma bigîrê peyberî, wazenê ke ma pey de game bierzê. Çiqas biwazê ma pey de bidê, ma tayêna zaf wayîrê rêxistinbîyena xo vejîyenê. Ma hîna zaf wayîrê tarîxê xo vejînîme. Hîna zaf ma mîyanê xebatan de ca gênê.”
‘Fransa rolê xo kay nêkena’
Peynîya qiseykerdişê xo de Aydenîz Dewleta Fransa ser o vinderte û qiseykerdişê xo wina qedêna: “Dewleta Fransa vana ma dewletêka demokratîk ê, ma zaf lez problemanê xo çareser kenê, no 12 serrî yo ke qetlîyamê Sakîne û embazanê bînan eşkere nêbîyo. Aye ra dima di serrî naye ra ver zî yewna qetlîyam bî. Dewleta Fransa eke vazena Rojhilato Mîyanên de biba wayîrê vatîşêk, lazim o ke sere de na dewa eşkera bikero. Fransa encax wina eşkena rolê xo kay bika.”
