Parlamentera DEM Partî Salîha Aydenîz meclîs de bale ant muhîmîya ziwanê dayîke ser û vat: ”Heqê ziwanê dayîke mewzûyê bazarîye nîyo û çew nêeşkeno nê sey lutufî bimojno.”
Parlamentera DEM Partî ya Mardînî Salîha Aydenîz Meclîsî de derheqê 21ê Sibate Roja Ziwanê Dayîke de qisey kerd û bale ant zilm û çinhesibnayîşê verba kurdkî ser o.
Salîha Aydenîz ard ziwan ke ziwanê dayîke heq o û ganî qanûnê bingeyî û huqûq de cayo xo bigîro û vat: “Xeylê welatan de tirkî wayîrê statuyî ya la nê welatî parçe nêbîyî, qey şima kurdkî ra hende tersene?”
Salîha Aydenîz ard vîrê ke bi milyonan kurdî kurdkî qisey kenê û nê vatî: “Tarîx û kulturê kurdkî xorîn o. Estbîyayîşê şaran bi qiseykerdişê ziwanê dayike bimana yo. Şarê kurdî semedê statuyî, ziwan, hemwelatîya seyyewbîne xover dano û bedelanê giranan dano. Ewro Tirkîya de kurdkî ya ke ziwanê bi mîlyonan kesan a, xeylê ziwanê dayîke yê bînî statuyê fermî ra mehrim yenê verdayene.”
Salîha Aydenîz îfa kerd ke tewr tay 33 dezgehê ke xizmetê perwerdeyê ziwanî danê ameyî qefilnayene, cayê şaredarîyan ke xebeta akademî û ziwanî kenê berê înan ameyî morkerdene û wina vat: “Nê polîtîkayê asîmîlasyonî ke yenê kerdene verba ziwanê şaran û mîrasê kulturî hêrişêk o. Heqê ziwanê dayîke lutuf nîyo. Çinhesibnayîşê ziwanê dayîke eslê xo de metodê şîdetî yo. Xora Tirkîya de şîdeto sîstematîk yeno kerdene. Eke ziwanê bi mîlyonan kesan kurdkî hema ziwanê perwerdeyî nîyo, no tena meseleyê huqûqî nîyo, polîtîkaya înkar û asîmîlasyonî ya. Nê welatî de heqê her kesî est o ke bi ziwanê dayîke perwerde bivîno. No heq nêeşkeno sey mewzûyê bazarîye û lutufî bêro mojnayene. Ziwanê şaran zengînî ya. Heqê ziwanê dayîke ke waştişê mîlyonan o, nêeşkeno bêro çinhesibnayene.”
