Yuksel Mutlu, dîyar kerd ke ganî şarê Sûrîye û bawerîyê ke mîyanê nê şerê Rojawanî de yê, ey rê wayîr vejîyê û vat: “Modelê ke ê do sey rol xo rê bigîrê, zergûn bibê kewtê a herre. Wexto ke ma nê vînenê, ma zanê ke o model a herre ra nêyeno vetiş û uca de ca girewto.”
No wexto de ke şerê Sûrîye dewam keno, medyaya dîjîtale û çapamenî de dîmenê teda û şîdetê şarî ser û bawerî ser hetê HTS û SMO ra yenê vila benê. Şar û bawerî ameyoxê xo ra bi qisawet ê. Îdareyê Xoserî yê Vakur û Rojhelatê Sûrîye ke modelê cuyêka pîya pê arde, semedê Rojhelatê Mîyanên sey modelêk nimûne yeno mojnayîş.
Komîsyonê Şaran û Bawerîyan ê Partîya Têduştî û Demokrasî (DEM Partî) ra Yuksel Mutlu rewşa şarî û bawerîyê herême Ajansa JINNEWS’î rê erjnayê.
Şerê parçebîyayîşî yê emperyalîstî
Yuksel Mutlu, derheqê şerî de wina vat: “61 serrî bî ke dîktatorî û rejîmê Baasî est bî. Rejîmêko winasîn o ke pîyê Esadî ra derbazê lajê Esadî bîyo. Wexto ke ma rewşa kaotîka ke nikayîne ra biewnîyê, Rojhelatê Mîyanên kewto dîzaynêko newe. Hêzê mîyanneteweyî ci de est ê. Îran, Rûsya, Sûriye û heto bîn ra Amerîka û welatê Yewîya Ewropa est ê. Aseno ke Rojhelatê Mîyanên de sermayedarê bi hêzî hewl danê ke netew-dewletê neweyî awan bikerê. Nê kaosî de parekerdişê emperyalîst est o. Hemverê nê de xoverdayîş est o.”
‘Şer semedê şaranê herême û bawerîyan tehluke yo’
Yuksel Mutlu dewamê qiseykerdişê xo de wina vat: “Wexto ke Esadî şewe berdî Moskova, herême teslîmê HTŞ’yî kerd. Bêşik na proje verî ra ameya hedrekerdiş û wina teslîmî Colanî bîya. Nê şerî tehrîbatî kerdê. Nê kaosî de dej, koçberî est ê. Şer uca de semedê şar û bawerîyan tersêko pîl awan keno. Çira, semedo ke îdareyo nikayîn rêxistinêko cîhadîst o. Ma qalê koalîsyonî kenê ke xeylêk rêxistinê cîhadî arê dano. Uca de rewşêka îdeolojîk est a. A rêxistinêka îslamîst, cîhadîst, nijadperest û neteweperest a.”
‘Şar û bawerîyê Rojawanî do ser bikewê’
Yuksel Mutlu dîyar kerd ke semedê nasnameyê elewî yê Beşar Esadî, şar bîyê hedefê rêxistinê cîhadîstî û wina vat: “Beşar Esad yew kes bî û komelê ke îdare kerdêne elewî nêbîyê, temamê komeleyê Sûrîye bî. Ma vajê Esad bi hawayêk demokrasî ra dûr û bi dîktatorî îdarekarî kerd, la gelo mimkûn o ke merdim yanişîyê îdarî yê kesêk bikero milê şarî? Rojawan modelê şarî yo. Şarêk semedê nê çira bêro cezakerdiş? Şar û bawerîyê ke uca de yê tersenê. La wexto ke ma modelê Rojawanî uca de vînenê, ma eşkenê vajê ke êdî o model a herre ra nêyeno vetiş, êdî uca de ca girewto. Zehmetî est ê, la îmkanê ma zî est ê. Rojhelatê Mîyanên çend ver bi nê dîzaynî şêro, şar û bawerîyê ke uca de yê do serbikewê.”
