Amed de bi waştişê statuyê Kurdkî û perwerdeyê bi ziwanê dayîke rayraşîyayîşo girseyî ame kerdene. Hemsereka Pêroyî ya DBP’yî Çîgdem Kiliçgun Uçar vat: “Ma pêro pîya eşkenê vera hêrişanê serê Kurdkî de vinderê. Ziwanê ma rumet û estbîyayîşê ma yo.”
Platformê Dezgehanê Demokratîk bi wesîleya 21ê Sibate Roja Ziwanê Dayîke ya Dinya Amed de rayraşîyayîş organîze kerd. Hemsereka Pêroyî ya DBP’yî Çîgdem Kiliçgun Uçar zî tewrê rayraşîyayîşî bîyî.
Şaro ke vernîya awanîya DBP’yî yê Amedî de ame têhet bi pankartê “Statuyê Kurdkî Perwerdeyo bi Kurdkî” akerd û dovîze sey “Dem demê ziwanê Kurdkî yo”, “Ez kurd a, perwerdeyê bi Kurdkî wazena” û “Azadîya zimanê kurdî bingeha aştiyê ye” girewtê û bi sologananê sey “Ziman rûmeta me ye” û “Bê ziman jiyan nabe” rayra şi.
Metnê eşkerayî de ame waştene ke wa Kurdkî bibo wayîrê statuyî û bibo ziwanê perwerdeyî û ame vatene ke dewleta tirke ganî goreyê ruhê prosesê ke 27ê sibate de dîya despêkerdene, semedê kurdkî gamanê pêtan bierzo. Eşkerayîye de ame vengdayene ke wa astengê verê kurdkî cade bêrê wedaritene, gamê huqûqî bêrê eştene û ame vatene ke heta caardişê nê têkoşîn dewam bikero. Reyna veng dîya kurdan ke wa her warê cuye de kurdkî qisey bikerî.
Çigdem Kiliçgun Uçar zî bale ante zextanê serê kurdkî ser û veng da wa dewlete polîtîkayanê înkarî caverdo û gamanê qanûnî bierzo. Çiğdeme Kiliçgun Uçar nê vatî: ”Ewro semedê azadîye û ameyoxê ziwanan rojêka muhîm a. Goreyê cigêrayîşanê ke ameyî kerdene kirmackî/zazakî çînbîyayîşî dir rî bi rî yo. Ma pêro pîya eşkenê vera hêrişanê serê kurdkî vinderê. Birêz Ocalan tim bale anceno muhîmîya têkoşînê seba Kurdkî ser o û vano ganî na babete de têkoşîn bêro kerdene. Dewlete ganî goreyê prosesê ke yew serrî ra zafêr o ameyo destpêkerdene, têbigêro û semedê statuyê Kurdkî û seba ke bibo ziwanê perwerdeyî, gaman bierzo. Ziwanê ma rumetê ma yo, ziwanê ma estbîyayîşê ma yo.”
Reyna xeylê şaristananê bînan ê Vakurê Kurdîstan û Tirkîya de bi waştişê statuyê Kurdkî eşkerayî û aktîvîteyê cîya-cîyayî ameyî kerdene.
