Şarê Dêrsimî seba awa werî şonê jîyarê Duldilî. Jîyarê Duldilî gilê koyî de ra û reyna zî cînî camêrd û kokimî şonê awe anê. Şarê anê: “Zulm o û hêsîrîya ma nê welatî de kemî nêbena.”
Şarê Dêrsimî her roje bîdonanê xo gênê şono jîyarê Duldilî keyeyê xo rê awa werî anê. Nê rojan ucreto tewr tay eşkera bi, ma zî pers kerd va, “şima nê ucretî senîn vînenê, bes o yan bes nîyo?” Xo ra zafêrî mîyanê feqîrîye de rê û cayêk ra ameyeyê xo çino. Hema pêro zî heşarê ekonomîyê Tirkîya û bê edaletîye yê. Dêrsimijanê ke ajansê ma rê qisey kerd û gazincê xo seba ucreto tewr tay mojnayê.
‘Tayê kesî hîrê meaşan gênê’
Dogan Kûrûkafa, of pof keno û kilmekî wina vano: “Çiqa pêre danê 28 hezarî nîyo? Ma towa bese nêkenîme bîjerîme. Wekîlê milletî hîrê aylîxun cêne. Reîsê cumhur kî zaf jêde cêno.”
‘Ma dewa xo de vesanîyê nêzanîtêne’
Beser Çîçeke bêrîya dewa xo kena, şaristanan de çinbîyayena kar û gurî, vêşanîye ser vindena: “Vêsanîme, kar û gure çin o, ma 6 serrî yo ke yeme îta de awe beme keyeyanê xo. Dewa ma rindeke bîye, mal û naxirê ma bî, zelalî û pakîye bîyî. Ma şîme Îstanbol, apey acerayme amêyme. Ma dewa xo de vesanîye nêzanitêne. Nika dewa ma de towa nêmendo. Merdene rinda nê halî ra. Cencî nêzewejînê, tersenê vanê ke domanê ma vêsan manenê.”
‘Ucreto asgarî zaf senik o’
Songul Çelîke zî hal û mezatê xo ser, ucreto tewr tay ser ma rê wina qisey kerd: “Asqarî ucret zaf senik o. Ma va ke belkî 35î ra jêderî beno, nêbî. Ma pê 28î çî bîjêrime, çi mejerime. Bidime wendîşê domanan, bidime kîra. Towa nêno girewtene, her çî bîyo bahalî. Na awe welatê ma de vejîna, ma bese nêkenîme bigêrime. Yenîme gile koyî. Awa muzirî ke bêro verê çeverê ma se beno? Serre de rey some marketû. Ma vazeme ke welate ma rê rindîye bêro, aştîye bêro, na xirabîye şêro. Na asma gaxane rindîye bîyaro. Bese nêkeme ke şêrîme dewa xo, çîyê biramnîme, dewê ma kerdî tal, tayê bese kenê sonê, ma çutur şerîme dewa xo.”
‘Her çi ra ju bi u gênîme’
Emîne Aydine cayê de gurîna la belê zaf şenik pere gêna aye ra debarê xo rind nîyo û bêedaletîye vînena. Wina vana: “Çira some gurîyînîme? 13 hezarî ceme û hatanû ke ameyîme çê raye de qedînê. Sala xizir pirnikanê înû ra bîyaro. Heq vîcdan û meramet bi dero înû. Sarê ma towa nêbeno çeyê xo. Ma eke çîyê ke cême, senik senik cême. Êyê ke zengîn ê xo rê cenê. Ma çutur bijerime. Her çi ra ju bi ju cême. Domanê ma jubînî kîsenê, simenê, kes nêvano ke nî çira hîn kenê. Feqîrîye est a, kar û gûre çin o. Ma gaxan de ron girewtêne nika bese nêkenîme ke bijerîme.”
‘Ma Dêrsim o veren wazenîme’
Elîf Gulere zî ziwan û îtîqatî ser o qisey kena û bêrîya Dêrsimê verênî kena û wina vana: “Feqîrîye û heşîrîye zaf a. Ma wazenîme ke, sarê ma zonê ma ra wayîr vejîyo. Gaxana aye ra ma nîyaz pojeme, some çê jubînî, domanê ma îtîqatê xo vîra xo ra mekerê. Ma Dêrsim o verên wazenîme, mînetê ma hênî ya. Verê ma vatêne ke, ‘some Mamekî ra hewla cême, ron cême,’ a çêf ra şîyêne sûke. Nika bese nêkeme ke, şîrîme marketû. Nika vesanîye est a, îsonî juminî kîsenê sevata kar. Vatena mi sarê ma ra awa ke, gaxana xo, zonê xo, jîyaranê xo, îtîqat û kulturê xo, xo vîrîra mekerê. Şerê pîr û taliwê xo. Nîyaz û qirvannanê xo bi kerê.”
