Konseyê Sivîl ê Şarê Herême yê Hondurasî Abdullah Ocalanî rê mektub erşawit. Mektubî de vat. “No demo ke şima hewl danê ke seba şaran aştî aver berê, ma do şarê şima reyde bibê.”
Konseyê Sivîl ê Şarê Herême yê Hondurasî (COPINH) Rayberê Şarê Kurdî Abdullah Ocalanî rê mektub erşawit. Mektubî de ewil wina ame vatene: “Koyanê Intbuca yê pîrozan ra seba zerrîya şarê kurdî, şarê Lenca yê binê sîwana COPNH’î yê rêxistinbîyaye ra seba girewteyê sîyasî Abdullah Ocalanî rê mektub. Ma koyanê kesk ê Intcuba ra mesajê wa û birayî to rê erşawenê.”
Pêroyê mektubî wina yo:
“Ma şarê Lenca yê awe û herre, Lempîra û Berta Caceresa COPINH’î xo bi rêxistin kerdo.
Ma kokê xo yo xorîn ê têkoşînê xo yo hempare ra şima rê nusenê. Rixmo ke dora şima bi dês û demîran girewte ya, vayê xoverdayîşê yê rojhelatî reseno ma. Rixmo ke hewldayîşê hêzanê pîl ê leşkerî, bazirganî û aborî ke wazenê ma xerîta û hişê merdimîye ra vejê; no vaja ma rê behsê şarê kurdî keno, behsê şarêkî keno ke herra xo, heqê xo yo cuya azade bi rûmet paweno, tira fek veranêdano. Hondurasî de talanê asîmîlasyonê ke tena merq, feqirî û bêziwanîye xo ra pey verdano, ma çemanê xo pawenê. Ma çemê pîroz Guaşcarque pawenê ke hemraya ma Berta Caceres pawit. Hemraya ma Berta Caceres seba ke vernîya cinawirî bi nameyê averşîyayîşî warişte, ameye kiştene. Seke paradîgmaya şima de zî ame dîyarkerdene, ma zanê ke azadîye hukmat û şîrketanê pîlan ra nêyena, la herême, kounalîte û têkilîya xurt a herre reyde yena. Ma fikranê şima yê xoserî, komelkîbîyayîş, azadîya şaran û cinîyan îlhamêko pîl gênê. Ma tesîr û paradîgmaya şima ya konfedarîlîzmo demokratîk ke gulbang dayo, bi rengê rayberîya ke xo dana xorayberî û nêzdîbîyayîşê edaletî keno ke pîlanê ma ra mendo. Bêyî ferzkerdiş û îşxalekrî, bêyî dewletanê zordar yan zî rêxistinanê sûcî, ma bi waştişê cuye resenê yewbînan. Hetê bîn ê dinya ra ma hêz û weşîye şima rê wazenê.
Ma hêvî kenê ke no mektubê ma bibo toximêk seba nêmusayîşê girewtemendişî. Wa vatiş û fikrê şima zerrî û mezgan de şîn bîbê ke xeyalê dinyayêka cîya û pîle kenê, cuya azade petrol, zerd û sînoran ra hîna qîmetêr vînenê. Nê demê de ke şima hewl danê seba şaran aştî awan bikerê, ma do şarê şima reyde bê. Seba ke demo ke şarêk xover da, tu xanedan nêeşkeno heta peynî est bo. Seba ke demo çemêk deyîrî vatî, tu aştîyêk çin o ke ey vindarno. Seba gama bi rûmete gird bîye, rayraşîyayîşê tarîxî bedilîyeno.
Ma şima bi hurmetê keso ke bedêlê hêvîya azadîye dano, hembêz kenê. Ma hem azadîya şima hem zî azadîya heme şaran wazenê ke kultur, beden û herra xo vera zîncîra îqtîdarî pawenê. Bi qerardarî, xoverdayîş û vîr ê şarê Lencayî.
COPINH Temmuza 2025î
Konseyê Sivîl ê Şarê Herême yê Hondurasî”
