Endama MYK’î ya DBP’yî Elîf Tîrenç Îpek, derheqê hêrişanê vera Taxanê Şêxmeqsûd û Eşrefîye de destnîşan kerd ke şarê kurdî bi ronayîşê yewîye eşkeno verê hêrişan bigêro û wina va: “Eke ma nêbî yew û sey şarî pîya cewab nêdî nê hêrişan, şarê kurdî do qirkerdişî reyde rî bi rî bimano.”
Çeteyê paramîlîterî yê ke girêdayeyê hukumetê demkî yê Sûrîye û Tirkîya yê, 6ê Çele ra nat hêrişanê giranan benê serê taxanê Şêxmeqsûd, Eşrefîye û Benî Zêdî yê Helebî. Kurdîstan, Tirkîya û welatanê Ewropa de xeylê kesî vejîyayî kuçeyan û nê hêrişî şermezar kerdî.
Endama Heyetê Rayberîya Merkezî (MYK) ya Partîya Herêmanê Demokratîkan (DBP) Elîf Tîrenç Îpek derheqê hêrişan de ajansê ma rê qisey kerd û destnîşan kerd ke şarê kurdî bi ronayîşê yewîye eşkeno verê hêrişan bigêro.
‘Tirkîya bi ferasatê mêtîngerîye têgêrena’
Elîf Tîrenç Îpek behsê polîtîkayanê dewletanê emperyalîstan ê serê Rojhelatê Mîyanênî kerd û bal ant hesabanê Amerîka, Îsraîl û Îngilîstanî yê serê Sûrîye. Elîf Tîrenç Îpek dîyar kerd ke Tirkîya zî hêzêkê emperyal a û wina va: “Tirkîya bi ferasatê mêtîngerîye têgêrena. Tirkîya wazena Sûrîye de para xo bigêro, uca bibo wayîrê qiseyêke û bibo hemkara desthilatîya uca. Tirkîya îhtîmalê ke şarê kurdî Sûrîye de destkewteyan bidest bixo, kena baxaneyê mendişê Sûrîye. Coka mudaxeleyê Sûrîye kena. Tirkîya semedê dewamkerdişê têmîyankerde ya uca, hêzanê emperyalan reyde têgêrena.”
‘Çeteyî hetê Tirkîya ra yenê miqatakerdiş’
Elîf Tîrenç Îpek dîyar kerd ke bêvengîya sazî û dezgehanê mîyanneteweyîyan û dewletan girêdayeyê polîtîkayanê emperyalîstan a û wina dewam kerd: “Çarçewaya polîtîkayanê ke rayra benê de bêveng manenê. Bêvengîya înan tercîhêko polîtîk o. Semedo ke şerê desthilatî yê Sûrîye de dewam keno zî bêvengîyêk est a. Îsraîl, Amerîka, Îngilîstan, Tirkîya parçeyê ney ê.”
Elîf Tîrenç Îpek, bal ant ser çeteyanê ke girêdayeyê Tirkîya yê û wina dewam kerd: “Ê çeteyî sey bingeyî DAIŞ’î ra ameyê û hêzê cîhadîst ê ke sey silgirî yenê şuxilnayîş ê. Nê çeteyê ke silgirê şerî yê, hetê Tirkîya ra yenê miqatakerdiş. Semedo ke têmîyankewteya Sûrîye, Vakur û Rojhelatê Sûrîye karê xeylê dewletan yeno, bêvengîyêk est a.”
‘Rojawan de gefî kurdan ra yenê werdene’
Elîf Tîrenç Îpek behsê polîtîkayanê Tirkîya yê prosesê “Aştîye û Komelê Demokratîkî” kerd û nê çîyî vatî: “Hetê kurdan ra şima nêeşkenê Vakurê Kurdîstanî û Tirkîya de vajê aştîye, Rojawan û Sûrîye de paştî bidê şerî. No semedê herkesi rîskêk o. Tirkîya mudaxeleyê destkewteyanê şarê kurdî yê Sûrîye û Rojawanî kena. Bi nê nakokî ne zere de ne zî teber de polîtîkayêka başe, nêeşkena bêra rayraberdene. Semedê şarê kurdî her çar parçeyan de zî tehlûkeyê qirkerdişî esto. Coka nîno qebûlkerdiş ke demêk ke Vakur de prosese aştîye yena rayraberdene de, bi qirkerdişî gefî kurdanê Rojawanî ra bêrê werdene. Kurdêko ke serê rîyê dinya de ciwîyeno na yewe qebûl nêkeno. Nê polîtîkayê Tirkîya yê dirîyîye est ê. Nê polîtîkayanê Tirkîya ra zî dîyeno ke prosesê ‘Aştîye û Komelê Demokratîkî’ semedê aye çi îfade kena. Çîke heta nika proses de her tim mijul kenê. Hema gamêke verçimî nêeştê. Coka bawerî zî nêda şarê ma yê tîyayî. Polîtîkayê qirkerdişî yê ke Tirkîya Sûrîye û Vakur û Rojhelatê Sûrîye de vera kurdan rayra bena zî na yewe piştrast kenê.”
‘Eke ma nêbî yew, ma do şirî yew bi yew’
Elîf Tîrenç Îpek destnîşan kerd ke semedê verê hêrişanê vera taxanê Şêxmeqsûd û Eşrefîye bêro girewtiş, gereka şarê kurdî yewîya xo bîyaro ca û qiseykerdişê xo wina qedîna: “Derheqê yewîye de xeylê xebatî ameyî kerdiş hema zî yenê rayraberdene. Şarê kurdî her çiqas ameyo parçekerdiş zî gereka ruhê yewîye mîyanê xo de bihewîno. Prosesê Kobanî de ma na yewe bi awayêko zelal dî. Şarê kurdî yê Rojawan qirkerdişêkî reyde rî bi rî mend. Bi serewedartişanê Vakur û Başûrî, Kobanê eşkena cîf bigêro. Coka gereka semedê prosesî nika zî xebatêka sereke yewîye ser o bêra kerdiş. Vateyêkê pîlan esto; ‘Eke ma nêbî yew, ma do şirî yew bi yew.’ Eke ma nêbî yew û sey şarî pîya cewab nêdî nê hêrişan, şarê kurdî do qirkerdişî reyde rî bi rî bimano. Gereka verê her çî ma bibî yew.”
