Verfeka Meclîsa Cinîyan a DBPyî Bêrîvan Bahçecî, Sûrîye de rewşa dimayê wederîyayişê rejîmê Esadî û hêrîşê ver ba Rojawanî erjna û wina vat: “Bi rayberîya cinîyan do nê hêrîşê hemverê Rojawayî nêresê amancê xo û do şar serbikewo.”
Hêrişî Tirkîya û cergî ke girêdayeyê aye SMO 27ê Teşrîna Peyîne ra nat dewam kenê. 8ê Kanûne de Heyet Tahrîr El-Şam (HTŞ), dekewte Sûrîye û rejîmê Esadî werte ra wedarna. Dima ra teyareyê şerê yê Tirkîya û cergê girêdayeyê aye SMO, Minbic û dewî dormeyê ci de dest bi hêrîşan kerd.
Verfeka Meclîsa Cinîyan a DBPyî Bêrîvan Bahçecî, hêrîşê hemverî Vakûr û Rojhilatê Sûrîyeyî erjnayî.
‘Talukeya DAÎŞî’
Bêrîvan Bahçecî dîyar kerd ke hêrişê Tirkîya hemverê Rojawanî dewam kenê. Û hetî bînî ra bale ante tehlukeya DAÎŞî. Bêrîvan Bahçeçî vat: “Bi rayberîya Kurdan estbîyayîşê sîstemê sey Rojawan bibo, têkîlîya cerganê winasînan bi dewleta Tirk reyde nêbo analîzêko kêm beno. Tirkîya de rojanê peyînan de yew hetî ra behsê prosesê çareserîye bîyêne, hetî bînî ra zî hemverê Rojawanî hêrişê yenê kerdene. No zî mojneno ke 10 serran de hişê dewletî de hemverê Kurdan çîyêk nêbedilîyayo.”
‘Şarê Rojawanî do serkewo’
Bêrîvan Bahçecî: “Dewletî ke dişmenê cinîyan ê û zîhnîyetê DAÎŞî wazenê xo cinîyan ser o est bikê. Şerran de hedefê yewin ê nê zîhnîyetan cinî yê. Ma hereketê cinîyan ê Kurd vanê ke seserra 21. Do biba yê cinîyan. Dewletî ke dişmenîya cinîyan kenê û zîhnîyetê sey DAÎŞî wazenê cinîyan ser o xo payî ra bimanê. No semed ra hedefê înan o yewin cinî benê. Ma 10 serrî ra ver şorişê Rojawan û Şengalî ra biewnê ma vînenî ke bi rayberîya cinîyan bîyê. No semedî ra cînîyan hedef gênê. Şengal de bi hezarî cinîyî bazaranê koleyan de rotê, remnayê û hema zî înan destî de cinîyê koleyê est ê. La cinîyî hemverê nê zîhnîyetî de xo rêxistin kenê û xo ver danê. Ewro zî reyna cinîyî nê zîhnîyetî reyde şer kenê. Tewr vernî de reyna cinîyî ca gênê. Eke reyna şorişêk bibo do reyna bi saya cinîyan bibo. Dewlet û hêzî ke zîhnîyetê sey DAÎŞî de yê do bi destê cinîyan werte ra wedarîyê. Ê do teqez nêeşkê serbikewê. Kurdî do serbikewê û şarê Rojawanî do serbikewo.”
‘Wazenê agêrê 10 serrî ra ver’
Bêrîvan Bahçeçî wina vat: “Sebebê hêrîşanê Tirkîya û cergê girêdayeyê aye SMOyê ewilîn yê Rojawanî sîstemê xoserîye yo. Peyê nê hêrîşan de zîhnîyetî “pare bike, lete bike, idare bike” est o. Rewşa nikayîne ra dîyar beno ke, herême de wazenê agêrê 10 serrî ra ver. Zîhnîyetî DAÎŞî wazeno xo reyna nîşan bido. Eke ma ewro nê herêman de nê hêrîşan vînenê siba do nê hêrîşî welatanê înan de zî xo bimojnê.
‘Seba cinîyan vengdayîş’
Bêrîvan Bahçecî ard ziwan ke, hemverê şeranê Rojhelato Mîyanên de ganê her kes paştî bido Kurdan û wina vat: “Şarî ke wazenê erdê xo ser o sîstemê xoserîye bidê roniştiş, kesî ke waştişê demokrasîyî kenê ganê vengê xo hemverî nê hêrîşan de berz bikerê. Şert o ke şarê bînî hetî Kurdan, Rojawanî û Şengalî de bibê. Ma kamca de benê bibê ganê ma hemverê nê hêrîşan de venê xo berz bikerê û ci rê nelet bîyarê. Çike no tena seba Kurdan ney seba heme şaran taluke yo. No semedî ra ma sey hereketê cinîyan ê Kurd, ma kamca de bibê zî ma do têkoşînê xo bikerê. Ma do hetê şarê xo yê Rojawan û Şengalî de bibê. Ma wazenê ke heme cinîyî vengê xo berz bikerê.
