Çalakîyê yadkerdişî şehîdanê Qirkerdişê Parisî yê Dîyînî dewam kerdî. Şaredara 10. ya Parîsî û sîyasetmedaranê Fransa veng da ke wa nê qirkerdişî bêrê roşnîkerdene û ê hetê Kurdan de yê.
Merkezê Kulturê Kurdan ê Ahmet Kayayî yê Parisî de yadkerdişê şehîdanê Qirkerdişê Parisî yê Diyînî vizêr serê sibayî ra heta şanî dewam kerdî.
Şan saete 18.00î de bi girseyî qirkerdişê dewleta Tirke û bêvengîya dewleta Fransa amey şermezarkerdiş. Çalakîye de sloganê “Şehîd namirin” û “Jin, Jîyan, Azadî” ameyî vatene.
Hemsereka CDK-F’yî Xanê Akdogan tîya de qisey kerd û vat: “Cinîyê ke serkêşê Şorişê Rojavaî yê, tim hetê dewleta Tirke ra yenê hedefgirewtene. La ma soz danê ke rêçê înan teqîb bikerê. Evîn Goyî vera DAÎŞ’î şer kerd, Ewropa zî pawite la Ewropa a nêpawite. Ma nê qirkerdişî û bêvengîye şermezar kenê.”
Hemserekê CDK-F’yî Şahîn Polatî vat: “Ma do tim wayîrê mîrasê Evîne vejîyê û statuyê Rojavayî bipawê.”
Nameyê TJK-E ser o Arşeme Ahmed wina vat: “Şarê ma rixmê hêrişan zî Şorişê Rojavayî paweno û qetî apey game nêerzeno. Ez venga şarê Kurdî dana ke Rojava Kurdîstan o, Kobanê Kudîstan o.”
Şaredara 10. ya Parisî Alexandra Cordebard vat: “Paris erdê kurdan o û do tim wina bibo. La heman wextî de Paris bîyo warê qirkerdişê kurdan. Ma do Kurdan bipawê. Wa Dozgerîya Terorî ya Parisî derheqê nê qirkerdişan de têbigêra.”
Nameyê keyeyê Evîn Goyî ser o Zeynep Kara qisey kerd û wina vat: “Parîs seba ma dejêko pîl o. Ma do heta nefesê xo yê peyênî edaletî biwazê û têkoşînî rê dewam bikerê.”
Nameyê Partîya Keskan a Fransa ser o Amînata Nîakate venga dewleta Fransa da ke wa Qirkerdişanê Parîsî roşnî bikera.
Nameyê Partîya Sosyalîste ser o Genvîeve Garrîgos vat: “Ma kurdan reyde yê û wazenê ke PKK lîsteya terorî ra bêro vetene.”
Qiseykerdişan ra dima hunermendan Meral Alkan, Nuarîn, Farqîn û Ozan Marufî deyîrî vatî.
