Şaristanê Bologna yê Îtalya de Hemwelatîya Rûmetî dîyaye Rayberê Şarê Kurdî Abdullah Ocalanî. Merasîmêko taybetî de ame vatene ke hemwelatîye semedê paştîdayîşê vengdayîşê 27ê sibate ameye dayene.
Şaristanê Bologna yê Îtalya de 17ê adare de qerar amebi girewtene ke Hemwelatîya Rûmetî bidîyo Rayberê Şarê Kurdî Abdullah Ocalanî. Hemwelatîya Rûmetî bi merasîmêko taybet teslîmê birazayê Rayberê Şarê Kurdî Abdullah Ocalanî û parlamenterê DEM Partî Omer Ocalanî bîye.
Saraya Accursioyî ya Bologna de aktîvîte ameye organîzekerdene. Hemkara Şaredarî Emîly Clancy, Sereka Meclîsê Şaredarî Maria Caterîna Manca, Serekê Grûba Koalîsyonê Sîvîlî yê Meclîsê Şaredarî Detjon Begaj û endamê meclîsî û Endama TJK-E Zîlan Dîyar û Buroyê Erformasyonî yê Kurdîstanî ra Yilmaz Orkan tewrê merasîmî bîyî.
Verê merasîmê ke çapemenîya Îtalya eleqayêka girde mojnaye ci, Omer Ocalanî cewab da persanê çapemenîye.
Merasîmî bi qiseykerdişê Marîa Caterîna Manca dest pêkerd. Manca bale ant tecrîdo ke Rayberê Şarê Kurdî Abdullah Ocalanî ser o yo û behsê têkoşîn û felsefeya ci kerd. Manca ard ziwan ke Hemwelatîya Rûmetî tena sembolîk nîya û vat no eynî wextî wayîrvejîyayîşê vengdayîşê 27ê sibate yê Rayberê Şarê Kurdî Abdullah Ocalanî yo.
Hemkara Şaredarî Emîly Clancy zî vat Rayberê Şarê Kurdî Abdullah Ocalan tena semedê Kurdîstanî ney vera heme problemanê komelkî bi felsefeya konfederalîzmo demokratîkî rayîrê çareserîye mojneno. Clancy vat wayîrvejîyayîşê Rayberê Şarê Kurdî Abdullah Ocalanî hemverê zilmî de vindertiş o.
Omer Ocalan zî nê vatî: “Îtalya gerek sey welatê demokratîkî paştî bido têkoşînê şarê kurdî yê semedê çareserîya meseleyê kurdan. Îtalya û Ewropa gerek paştî bidê têkoşînê demokrasîyî yê kurdan. Pêkewtişê Rojhelatê Mîyanênî tesîrê Ewropa zî kenê. Coka aştî hewce kena û gerek Îtalya û Ewropa zî paştî bidê prosesê aştî.”
Badê qiseykerdişan Hemwelatîya Rûmetî ke dîyaye Rayberê Şarê Kurdî Abdullah Ocalanî teslîmê birazayê ci Omer Ocalanî bîye.
Îtalya de heta nika 20î ra zafêr şaredarîyan hemwelatîya rûmetî/fahrî daye Rayberê Şarê Kurdî Abdullah Ocalanî. Mîyanê nê şaredarîyan de Palermo, Napoli, Palagonia, Reggio Emilia, Riace, Martano, Pinerolo, Castel de Giudice, Castel Bottaccio, Berceto, Cinquefrondi, Fossalto zî ca genê.
