Gimgim o ke di dewrî bi destê qeyûmî tehdayanê pîlan ame îdarekerdiş û nika zî DEM Partî îdare keno, Hemşaredara Şaredarîya Gimgimî Gulbahar Kaya va: “Seba cinîyan projeyê ma yê cayê îstîhdamî û seba ciwanan zî projeyê ma yê cayê kulturî est ê.”
Şaredarîya Gimgimî (Varto) ya Mûşî, weçînayîşê herêmkî yê 2014î de Partîya Aştî û Demokrasî (BDP) bi %63.4 reyan verên bîbî. Badê weçînayîşan polîtîkaya qeyûmî ya îqtîdarî 11ê teşrîna teyêne 2016î de qeyûm amebî tayînkerdiş. Weçînayîşê herêmkî yê 2019î de zî Partîya Demokratîk a Şaran (HDP) bi %44.16 reyan îdareyê şaredarîye qezenc kerdbî; la 18ê kanûne 2019î de reyêka bîne qeyûm amebî tayînkerdiş. Reyna zî vera heme polîtîkayanê qeyûmî şarê Gimgimî weçînayîşê îdareyê herêmkî yê 31ê adare de bi reyanê %60.49 DEM Partî kerd partîya yewin û îdareyê şaredarîye reyna DEM Partî girewt.
Hemşaredara Şaredarîya Gimgimî Gulbahar Kaya, derheqê xebatanê şaredarîye de ke cinîyan kenê merkez erjnayîşî kerdî.
‘Ma bi tehdayanê pîlan şaredarîye girewte’
Gulbahar Kaya ke ard ziwan ke Şaredarîya Gimgimî di dewrî hetê qeyûmî ra ameya îdarekerdiş. Gulbahar Kaya dîyar kerd ke nê wextî de qeyûman nameyê xizmetî ser o seba şarî tu xebatêk nêviraşta, eksê ci heme îmkananê şaredarîye seba xo şuxilnenê. Gulbahar Kaya ke va çop zî nêameyo arêdayîş di dewrî qeza de û awa şimitişî ya pak zî nêdîyaya şarî û wina va: “Weçînayîşê herêmkî yê 31ê adare de ma bi ferqêko pîl şaredarîya xo destê qeyûmî ra girewte. Eslê xo de bi tehdayêka pîle ma şaredarîye teslîm girewte. Ma endamanê meclîsê yê şaredarîye reyde fikirîyayê û ma vat ‘ma senî eşkenê rast bikerê’ dest bi karî kerd. Çîyo ke şaredarîye de çiman ver de bî no bî ke karkerê cinîyî karî ra estê. Wexto ke ma şaredarîye teslîm girewte, ma programêk viraşt û xebatê ma seba cinî û ciwanan dest pêkerdê.”
‘Keyeyê goşdarîye yê cinîyan ame akerdiş’
Gulbahar Kaya ke derheqê xebatanê cinîyan de qisey kerd wina dewam kerd: “Sifte ma seba cinîyan keyeyêko goşdarîye akerd. Sebebê akerdişê nê keyeyê goşdarîye cinîyê ke dewan ra yenê merkezê qeza qahwexaneyan ver de maxdûr bîyêne. Cayêko ke eşkenê şêrê, eşkenê xo rehet his bikerê, çin bî. Nika keyeyê goşdarîye xizmet dano. Cinî şênê bêrê hewcedarîyanê xo bivînê û xo rehet his bikerê. Heta ke waesayîtê dêwe bêrê, şênê uca de vinderê.”
Projeyê ekonomîkî û kulturî seba cinî û ciwanan
Gulbahar Kaya îfade kerd ke riyê tehdayanê qeyûmî ra, Gimgimî e zaf hewcedarî û waştişî estê û vat: “Nimûneya tewr dîyar no yo ke rayîrî halêko zaf xirab de yê û çopî nêyenê girewtene. Nika problemo tewr gird ê cinîyan no yo ke azadîya ekonomîkî çin a. Nê semedî ra ma hewl danê ke cayanê karî seba cinîyan akerê. Nê hêtî ra projeyê ma yê ke ma xo ver de ronayî, est ê. Seba ciwanan zî ma do seba ke bieşkê înan bi ziwan û kulturê xo yê dayîke p^İl bikerê, ma do merkezê kulturî akerê. No zî mîyanê projeyanê ma yê verênan der o.”
