Şaredarîyê Lozan, Renens û Veveyê yê Swîsreyî seba destek bidê Rojava şewe viraşte. Şewe de hetkarî ame komkerdene do bi rayîrê Heyva Sor a Kurdîstanî biresnê Rojava.
Semêde hêrişanê vera Rojavayê Kurdîstanî bi se hezaran kesî neçar mendî ke keyeyanê xo biteriknê û bêrê herêma kurdan bi ca bibê. Semedê krîzê merdimî, Heyva Sor a Kurdîstanî pêroyî dinya de kampanyaya hetkarî organîze kerde. Sere de Vakur û Başûrê Kurdîstanî, xeylê şaristanan de kampanyayê hetkarî dewam kenê.
Xeylê namdarî tewrê kampanya bîyê
Bi pêşengîya şaredarîyê Lozan, Renens û Vevey, bi hetkarîya Merkezê Komelê Demokratîk ê Kurd ê Lozanî (NCDK-Lozan) û Meclîsê Cinîyan ê Lajînî bi amancê paştîdayene awanîya Salle de Spectacle yê şaristanê Renense çalakîyêkî viraşte. Sîyasetmedar û şaredarê Swîsreyî zî tewrê çalakîye bîy. Heme hetkarî ke şewe de kom bîyê seba hetkarîya Rojava bexişê Heyva Sor e kerd.
Hewcedarîya koçberan bi hetkarî est a.
Hemseroka NCDK-Lozanî Aysel Argîn derheqê rewşa koçberan ê Rojava û averşîyayîşê peyênî de agahî daye beşdaran û ard ziwan ke yê seba paştîdayena Rojavayê Kurdîstanî na çalakî viraşta û ameyê têhet. Argîn wina vat: “Paştîdayena koçberanê ke wareyê xo ra dûrî kewtê hewcedarîya înan zaf est a. Ez spasîya şaredar, endamanê meclîsî şaredarîye û temsîlkarê partîyanê sîyasî kena ke keda înan na şewe de est a. Ez heme kesê ke paştîdayene gird kenê înan selam kena. “Biciwîyo Xoverdayîşê Rojava.”
Hetkarî do biresnê koçberan
Çalakî de Şaredarê Renensê Jean François Clément, Endamê Partîya Karkeran ê Lozanî (POP) Xavier Roth, Endama Meclîsê Şaredarîya Lozanî yê POP’î Sevgî Koyuncu, sereka rêxistana ciwanan ê Partîya Sosyalîst (SP) Julien Berthod û Namzeta Endame Şaredarîye yê POP’î Tanya Nîhal Işik qisey kerd. hasilato ke şewe de werdene û şimetene ke ameyê rotene ra kom biyo do bi rayîrê Heyva Sor a kurdîstanî Rojava rê bêro şawitene. Heyva Sor eşkera kerd ke do rojanê aver de derheqê hetkarîyan de eşkerayîyêke resmî bido.
