Îdarekaro Pêroyî yê Waranê Petrolî yê Rîmelanî Dr. Ehmed Îbrahîmî vat ke pêvînayîşê heyetê Şamî reyde dewamê produksîyonî û zêdekerdişê kapasîte ame qiseykerdene û emnîyet heta ke entegrasyon biqedîyo do hetê HSD’yî ra bêro temînkerdene.
Çarçeweya peymana 29ê çeleyî de, heyetî Şamî û rayedarê waranê petrolî yê Rîmelanî ke binê kontrolê HSD’yî de yê, vizêrî Rimelan de ameyî têhet. Kombîyayîş nêzdîyê 45 deqayî dewam kerd û dima heyet şî waranê petrolî yê Tirbespîye û kontrol kerd.
Dr. Îbrahîmî vat ke kombîyayîş bi hewayêko pozîtîf vîyarto û derheqê ameyoxê waranê petrolî û gazî de detayî nêameyî qiseykerdene. Seba emnîyetê waranê petrolî, Îbrahîmî vat ke na mesele kombîyayîşî de nêameye rojeve û heta ke muzakereyê entegrasyonî biqedîyê emnîyet do hetê HSD’yî ra bêro temînkerdene.
Îbrahîmî sewbîna vat ke heyetê Şamî melûmat da ke şîrketê petrolî yê mîyanneteweyî yê Amerîka Chevronî reyde peymane ameya kerdene û bi şîrketêka bîne de zî têkilîyê înan dewam kenê. Amancê înan waranê mevcûdan ra berhemgirewtiş zêdêyor o û başkerdişê şertanê karkeran o. Îbrahîmî vat ke ê zî ameyî dawêtkerdene Şam û heyetê Şamî bi taybetî zêdekerdişê kapasîteya produksîyonî ser o şîrketê mîyanneteweyîyan reyde pêyenê. Heyetî vat ke karkerê herême, îdareyê mevcûdî û sazgehê taybetî do bêrê pawitene û nîyetê înan ê mudaxeleyî çin o. Hema takvîmêko zelal çin o la Îbrahîmî vat ke demê nêzdî de averşîyayîşê şênberî yenê pawitene.
