Serekê Delegasyonê Parlamentoyê Ewropa yê Partîya Sosyal Demokratîke ya Awusturya Andreas Schiederî vat: “Prosesê haştîye semedê demokratîkbîyayîşê Tirkîya firsatêk o.”
Serekê Delegasyonê Parlamentoyê Ewropa yê Partîya Sosyal Demokratîke ya Awusturya û Serekê Koma Xebate ya Kurdan a Parlamentoyê Ewropa Andreas Schiederî derheqê qerarê çekronayîşê PKK’yî û atmosferê sîyasîyî yê Tirkîya de erjnayîşê muhîmî kerdî.
Schiederî qerarê PKK’yî yê qedînayîşê têkoşînê çekdarî yo ke badê vengdayîşê Rayberê Şarê Kurdî Abdullah Ocalanî ameyê girewtene, sey “Nuqtaya bedilnayîşî ya tarîxî” pênase kerd.
Schiederî îfade kerd ke na game yena manaya qedînayîşê pêkewtişê bi des serran û nê vatî: “No qerar eynî wextî de semedê aştî destpêkerdişê têkoşînê neweyî û demokratîkî yo. Herêma ke xeylê serrî yo bi şîdet, zextî yena naskerdene hêvîya îstîkrarî kirişena. No semedê Tirkîya firsendêk o. Tirkîya nika eşkena cuya hempare ya ke tede huqûq û hurmetê mabênê şaran est o înşa bikera. La nê hêvîyî rîyê polîtîkayanê zextî yê Erdoganî ra binê tehluke de yê. No proses bi îradeyê raştî yê pêkerdişî nêbi. Seba ke Erdogan 2028î de reyna sey serekkomar bêro vîjnayene bedilnayîşê qanûnê bingeyî hewce kenê, coka na sey gamêka taktîkî yena vînayene. La çîyo ke Tirkîya hewceyê ci ya kayê hêzî yo newe nîyo, erjanê demokratîkî, corîya huqûqî û şarê kurdî rê gamêka samîmî ya.
Yewîya Ewropa gerek vera averşîyayîşanê Tirkîya hinî dahîna qerardar tewir bîgira. Erdogan game bi game demokrasîyî çin keno. Ewropa gerek hinî nê seyr mekero, paştî bido hêzanê demokratîkan ê Tirkîya, paştî bida komelanê sîvîl ê hêzdaran û mesajêko zelal bida. Tirkîya ke polîtîkayanê zextî rayra bena ne semedê endamîya Yewîya Ewropa ne zî semedê polîtîkayanê asayîşî eşkena biba hempare.”
Andreas Schiederî eşkerayîya xo bi sernameyê “Şansêk bidê aştî” hesabê xo yê medyaya dîjîtale ra zî pare kerd. Bi taybetî no mesajo ke bi fotografê gerîlaya ke alaya PKK’yî berz kena ame parekerdene, zaf eleqa dî.
