Hemşaredara Şaredarîya Amedî ya Şaristanê Girdî Serra Bucak, maçê Amedsporî ke Gençlerbirligi reyde kay kerd, seba 8ê Adare Roja Cinîyanê Kedkaran a Dinya, trîbuno ke bîbî sahneyê rengê morî, tede cinîyan reyde temaşe kerd.
Amedsporî ke Lîga 1. ya Federasyonê Futbolê Tirkîya (TFF) de mucadele keno, Stadyumê xo de Gençlerbirligi reyde kewt têver. Cinîyan bi organîzekerdişê Meclîsê Cinîyanê Şaredarîya Şaristanê Girdî, seba 8ê Adare Roja Cinîyanê Kedkaran a Dinya û seba ke piştî bidê Amedsporî, trîbunî de cayê xo girewt.
Hemşaredare Bucak, cinîyan reyde maç temaşe kerd
Hemşaredara Şaredarîya Şaristanê Girdî Serra Bucak, trîbunê ke tede serekê daîreyan, endamê meclîsî, personelê şaredarîye û cinî bîyî, maç temaşe kerd. Hemşaredare Bucak ke dekewtişê stadyumî de hetê endamanê heyetê îdareyî ra ameye qebulkerdene, trîbun de cinîyan ra eleqeyêko gird dî. Bucak ke cinîyan reyde sohbet kerd, cinîyan reyde fotografî girewtî.
Koreografîya 8ê Adare
Koreografîya 8ê Adare Roja Cinîyanê Kedkaran a Dinya ke verê maçî hetê terefdaran ra ameybî amadekerdiş, ameye ecibnayene.
Cinîyan trîbun kerd mor
Cinîyan ke formaya more xo ra daye û trîbun pir kerd, bi sloganan piştî daye Amedsporî. Cinîyan ke bale ante 8ê Adare Roja Cinîyan a Dinya ser o, pankartê kampanyaya “Vatişê ma nêqedîya, ma do pîya şîdetî vindarnê” ke seba 25ê Teşrîna Verêne Roja Têkoşîna Mîyanneteweyî ya Vera Şîdetê Cinîyan hetê şaredarîyanê DEM Partî ra dest pêkerd û do serrêk dewam bikero, trîbun rengê morî reyde xemilna.
Maç seypê qedîya
Maço ke Gençlerbirligi reyde 1-1 seypê qedîya, Amedsporî puanê xo kerd 40.
