Temsîlîyetê Paltformê Sazîyanê Demokratîkê ke 4ê Nîsane pîrozkerdişê rojbîyayîşê Rayberê Şarê Kurdî Abdullah Ocalan xebatan kenê, waştêne ke seba aştî û azadîye ganî her kes 4ê Nîsane de Amara de bo.
Rayberê Şarê Kurdî Abdullah Ocalan 4ê Nîsane 1949î de dewa Amara ya qezaya Xelfetî ya Riha de ame dinya. Rojbîyayîşê Abdullah Ocalan ê 76. do 3ê Nîsane de Parka 4ê Nîsane ya qezaya Xelfetî de bi festîvalêk bêro pîrozkerdene. 4ê Nîsane de zî do ver bi dewa Amara ya Abdullah Ocalanî ke tede ameyo dinya, do rayîrşîyayîşêk bêro kerdene. Festîval do bi pêşengîya Paltformê Sazîyanê Demokratîk û rayîrşîyayîş zî do bi pêşengîya cinîyan bêro kerdene. Xeylê şaristananê Vakûrê Kurdîstan û Tirkîya ra do xeylê kesî tewrê festîval û rayîrşîyayîşî bîbê. Endam û rayberê partîyanê sîyasî û sazîyanê sîvîl ê komelê ke mîyanê platformî de yê seba xebatê înan ê seba pîrozkerdişê rojbîyayîşê Rayberê Şarê Kurdî dewam kenê. Temsîlîyetê platformê do awanîya Rêxistina Partîya Têduştî û Demokrasîyî ya Şaran (DEM Partî) a Xelfetî de bêrê têhet, dima ra do seba silaynayîşê festîvale û rojbîyayîşê Abdullah Ocalanî dewe bi dewe taxe bi taxe bigêrê û şar silaynê festîval û rayîrşîyayîşî.
Endama Meclîsê Partîya Herêmanê Demokratîkan (DBP) Mulkîye Gulmez dîyar kerd ke xebatê înan ê seba pîrozkerdişê rojbîyayîşî Rayberê Şarê Kurdî Abdullah Ocalanî dewam kenê û wina vat: “Ma dewan de û mîyanê qeza de xebatanê xo domnenê. Germîya şarî û wayîvejîyayîş est o. Zafane zî germîya cinî û ciwanan est a. Do bi coşêko pîl 4ê Nîsane bêro pîrozkerdene.”
‘Pîrozbayî do bibo wesîleyê aştî û azadîye’
Mulkîye Gulmez da zanayene ke do 4ê Nîsane de festîvalêk bêro ronayene û wina dewam kerd: “Şarê ma. Bi coi xo amade keno û nika ra kewtê rayîran. Ma hêvî kenê ke do no pîrozbayî bibo wesîleyê aştî û azadîya Rayberê Şarê Kurdî Abdullah Ocalanî. Ma germayî, coş û wayîrvejîyayîşê şarî vînenê. Seba aştîyêka menda wayîrvejîyayîşêko xurt est o.”
‘Do bi pêşengîya cinîyan ver bi Amara rayîrî ra şêrê’
Mulkîye Gulmez dîyar kerd do rayîrşîyayîşê 4ê Nîsane yê ver bi Amara do bi pêşengîya cinîyan de bêro kerdene û wina dewam kerd: “Festîvalî de do konê ma yê seba cinîyan zî est bî. Ma do bi pêşengîya cinîyan dest bi rayîrşîyayîşê xo yê ver bi Amara bikerê. Bi girseyî, germayî û bicoş ma do xo biresnê keyeyê Rayberê Şarê Kurdî. Bi serran o şar paweyê na roje yo. Çend serrî qedexe û astengî est bî. Bi pêşengîya cinîyanê azadan ma do ver bi keyeyê Rayberê Şarê Kurdî rayîrî ra şêrê.”
‘Seba aştî û azadîye ganî her kes a roje cayê xo bigîro’
Hemserekê Federasyonê Komelanê Hiqûq û Paştîya bi Keyeyanê Girewteyan û Kesanê ke Hukm Werdo yê Medî (MED TUHAD-FED) Kerem Canpolat da zanayene ke hîrê rojî yo dewe bi dewe, taxe bi taxe, qeza bi qeza seba 4ê Nîsane xebatan kenê û wina vat: “Vengdayîşê birêz Abdullah Ocalanî yê 27ê sibate ra pey manayê na roje hîna zaf bî, şar bi na muhîmîye ci ra ewnîyeno. Ma nê çîyî cayê ke ma şîyê, ma ê cayan de zî dît. Ma wazenê xo biresnê her kesî. Seba aştî û azadîye wazenê her kes na roje de cayê bigîro û vengdayîşê birêz Abdullah Ocalanî rê wayîr vejîyo.”
‘Ganî ma destê birêz Abdullah Ocalanî xurt bikerê’
Kerem Canpolat bale ante muhîmîya 4ê Nîsane ser o û wina dewam kerd: “Vateyê birêz Ocalanî hêvî danê şaran. Ma qîymet danê vengdayîşê ey ê 27ê sibate. Seba ke vengdayîş cayê xo bigîro û destê birêz Ocalanî xurt bibo, ganî bi se hezaran siba û di siba Xelfetî de kom bibê û verê xo bidê Amara. Ma tena sey pîrozbayîya rojbîyayîşî na roje ra nêewnîyenê. Eynê wextî de sey paştîya vengdayîşî ci ra ewnîyenê. Ganî ma destê birêz Ocalanî xurt bikerê ke dewlete gaman bierza. Nê semedî ra ganî ma siba sey awe biherikîyê Amara. Ma veng danê şarê Kurdîstanî û Tirkîya ke 4ê Nîsane de Xelfetî de bê û ma verê xo bidê Amara. Ma îradeyê xo yê waştişê aştî, azadîye û vindernayîşê şerî bimojnê.”
‘Ma do wayîrê Serekê xo vejîyê’
Hemşaredara Xelfetî Sanîye Bayram zî da zanayene ke do ciwanê ke ewro biresê qezaya înan, bi hewayêko girseyî pêşwazî bikerê. Û wina vat: “Ma Xelfetî de xebatêka başe kerde. Ma Serekê xo û aştî rê wayîr vejîyenê. Ma bi taybetî cinî û ciwanan silaynenê Xelfetî. Wa bêrê ma destê yewbînan bigîrê. Heme şaran rê aştî lazim a. Wa heme şarî bêrê destê xo bidê destê ma û ma pîya çareserî bivînê.”
‘Bêrê ma pîya ver bi Amara rayîrî ra şêrê’
Hemsereka DEM Partî ya Xelfetî Aslihan Çîftçî zî seba rojbîyayîşê Rayberê Şarê Kurdî Abdullah Ocalanî heme şarî silayna Xelfetî û wina vat: “Ma dewe bi dewe gêrenê. Şar keyfweş o û vano ‘Birêz Abdullah Ocalanî gamêk eşta, ma aştî wazenê. Ma do nê prosesî pîya rayra berê.’ Ez veng dana heme dayîkan ke wa bêrê ma pîya şêrê Amara.”
