Remzî Kartalî derheqê prosesê Kongreya 12ine ya PKK’yî de agahîyî pare kerdî û ard ziwan ke têkoşîn dewam keno, seba awankerdişê komelê demokratîkî ganî her kes bi mesuldarî têbigêro.
Hemserekê KONGRA-GELÎ Remzî Kartalo ke ver û peyê Kongreya 12ine ya PKK’yî de Başûrê Kurdîstanî de bi derheqê xebatanê kongre û têkoşînê dewrê neweyî de ANF’yî rê qisey kerd.
Kartalî da zanayene ke bi Vengdayîşê Aştîye û Komelê Demokratîkî yê Rayberê Şarê Kurdî Abdullah Ocalanî herême de prosesêko newe dîyayo destpêkerdene û va: ‘’Nê vengdayîşî ser o kongre ameye pêser. Rixmê meseleyanê asayîşî zî PKK’yî kongre kerde. Kongre de mesajê Rayber Apoyî û raporo polîtîk ameyî pêşkêşkerdene. Kongre mîyanê şarî de hêvîyêke afernaye. Ez wextê kongre de Başûr de bîya û meseleyanê asayîşî ra nêeşkaya tewrê kongre biba. A raşte 2000 de Rayber Apoyî seba feshkerdişê kongre veng dabi la mîyanê rêxistine de meseleyî vejîyayî. O çax Rayber Apoyî paradîgmayêka newîye pêşkêş kerde. Mîyanê nê serran de dewleta tirke rixmê şerê teknîkî zî nêeşkaye netîce bigêra. PKK’yî surprîzê pîlî kerdî û têkoşînê xo rê dewam kerd. Ewro asta mîyanneteweyîye de şerê Rojhelatê Mîyanênî reyde krîz û tehlukeyê şerî est ê. Seba Tirkîya tehlukeyê pîlî est ê.”
Şert û mercê huquqî
Remzî Kartal wina domna: “Serek Apoyî no proses sey firsendî dî û prosesêko newe da destpêkerdene. Kadroyanê têgêrayîşê azadîye zî destek da Rayber Apoyî. Rayber Apoyî bi rayîrê heyetî mesajê xo şawit. No firsendê çareserîye tena seba kurdan ne seba dewlete zî girîng o. Xora Rayber Apoyî bi nuştekî û bi rayîrê hacetanê teknîkan mesajê xo şawitî kongre zî. Mi zî nê mesajî wendî û dîyî. Rayber Apoyî mesajê xo de venga partîye da ke bingeyê Komelê Demokratîkî û Aştîye de wa PKK xo fesh bikero, peynîya şerê çekdarî bîyaro û amadekarîya prosesêkê neweyî bikero. Seba ney ganî şert û mercê huqûqî yê prosesî bêrê awankerdene. Serok Apoyî prosesî ser o vat ‘Ez do dîyalogan bikera.’ PKKyî xo fesh kerd la werte de hêzêko çekdar est o. Ganî nê çekan war verdê û tewrê cuya komelî bibê. Seba ney ganî gamê sîyasî û qanûnî bierzîyê. Îmrali de mabênê Serek Apoyî û selahîyetdaranê dewlete de dîyalogî dewam kenê. Goreyê nînan xerîtaya rayîrî do eşkera biba.”
Têkoşîn dewam keno
Remzî Kartal wina qedîna: “Bi têkoşînê PKKyî hêrişê dewlete ameyî pûçkerdene.Hetê bînî ra Rojawan de paradîgmaya Rayber Apoyî ser o modelêk ame awankerdene. Rojhelatê Mîyanênî de krîzî est ê la mîyanê nê krîzan de zî têkoşînê azadîye yê kurdan xurt o. Na rewşe de Rayber Apoyî vengdayîşê xo kerd. Çarçewa paradîgmaya newîye de perspektîfê têkoşînê komelê demokratîkî do bêro caardene. Yanî têkoşîn do dewam bikero tena hacetî vurîyayî. Rayber Apo nika vano ‘Ganî teda, zorbazî est ê. Ganî zemînê sîyasetî û demokrasîyî bêro afernayene. Prosesê neweyî yê têkoşînî de ganî hacetî têkoşînê warê komelê sivîlî û demokratîkî bêro kerdene.’ Hacetê goreyê ney do nêzdî de bêrê mojnayene. Kodê têkoşînê neweyî yê rêxistinî û sîyasetî no yo. Têkoşîn dewam keno, têkoşîn nêqedîya. Hacetê têkoşînî vurîyayî.’’
