Endamê Meclîsê Pîranî yê Dêrsimî seba pîrozkerdişê bawerîya Çarşema Şiya şîyê Zîyaretgeyê Gola Çeto û uca de zî çeraxî vistî ta û loqma vila kerd.
Cografyaya Dêrsimî de Aşma Xizirî de hîrê çarşeme yê ewil ê aşma adare sey “Çarşema Şiya” yenê qebulkerdene. Çarşema Şiya kanşopîya qadîm a û sey ewilîya wisarî yena pîrozkerdene.
Çarçeweya bawerîya Çarşema Şiya de keye û warê pîrozî de çeraxan ta fînenê, qurbanan birnenê û loqmayan vila kenê.
Gulbangî wendê
Endamê Meclîsê Pîranî yê Dêrsimî mintiqaya Awa Munzur û Pulurî de Zîyaretgeyê Gola Çeto de kom bîyê. Ocaxê Baba Mansurî ra Pîran Bakî Aydin, Mehmet Halîs, Alî Onal û Ocaxê Seyît Sabunî ra Pîr Kaya Şahîn warê pîroze de çerax vistî ta û tewr peyên zî gulbangî wendê.
Dima zî Endamê Meclîsê Pîranî yê Dêrsimî verê Zîyaretgeyê Gola Çeto de deyîrî vatê û loqma vila kerdê.
