Platformê Sazîyanê Demokratîkan, Amed de “Rayîrşîyayîşê Çareserîya Demokratîke û Azadîye” da destpêkerdene. Rayîrşîyayîş ke kesê cîya-cîyayî tede ca gênê, heta Enqere dewam keno û do 20ê Kanûne de biqedîyo.
Parlamentera DEM Partîye Ayten Kordu ke beşdarê rayîrşîyayîşî bîya, ard ziwan ke ê seba welatêkê demokratîkî û çareserkerdişê meseleyê kurdî yê aştîyane kewtê rayîr. Kordu va ke îqtîdar seba çareserkerdişê meseleya kurdî gamêk nêerzeno û wina dewam kerde: “Bi nê rayîrşîyayîşî ma do Enqere de veng bidê ke meseleya kurdî bi rayîrê demokratîkî çareser bibo û Rêzdar Ocalan azad bibo.”
‘No Rayîrşîyayîşê Heqîqetî yo’
Hemserekê Pêroyî yê Komeleyanê Elewîyan ê Demokratîkan (DAD) Zeynel Keteyî va ke rayîrşîyayîşê înan ‘rayîrşîyayîşê heqîqetî’ yo. Keteyî wina dewam kerd: “Ma wazenê welatêko hempar de sey welatîyanê azadan biciwîyê. Na Komara seserrine vernîya cîyayîyan de ke bieşkê pîya biciwîyê asteng a. Na rewşe hem Rojhelatê Mîyanênî hem zî welatê ma hewanênena. Nê komelî rê ciwîyayîşêko bêzordarîye lazim o. No rayîrşîyayîş seba ney o.
