Şarê Amedî seba endama YJA-Starî Celîle Turk û endamê HPG’yî Ridvan Çelenk ke tarîxanê cîyayan de herêma Zap de cuya xo vîndî kerda, rayra şi û tezîye zîyaret kerd.
Keyeyê endama YJA-Starî Celîl Turk (Fîlîz Dêrsim) û Ridvan Çelenk (Têkoşer Dorşîn) ke tarîxanê cîyayan de herêma Zap ya girêdayeyê Başûrê Kurdîstanî ya, cuya xo vîndî kerda, keyeyê Tezîye yê Şaklatî yê qezaya Peyasî ya Amedî de tezîye ameye ronayene. HPG’yî vizêr eşkera kerdbi ke endamê îan Ridvan Çelenk 22ê temmuza 2019î de û Celîle Turk zî 18ê tebaxa 2019î de herêma Zap de cuya xo vîndî kerda. Ney ser o keyeyê Turk û Çelenkî seba gedeyanê xo tezîye ronaye. Xeylê endam û rayberê partîyanê sîyasî, Dayîkê Aştî, endam û rayberê sazagehanê sîvîlan beşdarê tezîye bîyê.
Rayîrşîyayîş ame kerdene
Xeylê kesî pêşengîya Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) ya Amedî de bi girseyî Parka Gedeyan ra heta keyeyê tezîye ya Şaklatî rayra şîyê. Rayîrşîyayîşî ra ver polîsan bi deqîqeyan girse dorpêç kerd û waşt ke rayîrşîyayîşî asteng bikerê. La encamê îsrarê dayîkan de girse bi çepik û tilîlîyan Parka Gedeyan ra heta keyeyê tezîye rayra şi. Girse sloganê “Şehîd namirin / Şehîdî nêmirenê”, “Ey şehîd rêya te rêya me ye / Ey şehîd rayîrê to rayîrê ma yo” vatî.
‘Ganî ma şehîdanê xo hîna zaf nas bikerê û bidê naskerdene’
Tezîye de hemserekê MEBYA-DER’î yê Amedî Ramazan Dengizî qisey kerd û dîyar kerd ke têkoşerê şarê kurdî seva înan bêmerg ê û wina vat: “Şehîdî nêmirenê, şehîdî benê rayberê têkoşînê ma. Heqî û Kemalan ra heta roja ewroyîne şarê kurd bedêlê giranî dayê. Bi saya nê şehîdan şarê kurd ewro pêroyê dinya de yeno naskerdene. Çîyo ke keweno milê ma ser o yo ke ganî ma şehîdanê xo hîna zaf bişinasnê û bidê naskerdene û têkoşînê înan xo rê esas bigîrê. A rast ma na babete de zaf kêm manenê. Ma keyeyê her di şehîdan rê serweşîye wazenê û vanê wa sereyê şarê kurdî weş bo.”
Tezîye bi zîyaretê xeylê kesan dewam kerd.
