Roniştişê doza Hemşaredara Hênêyî Besîle Narîne ame viraştiş. Dozgerî waşt Besîle Narîn bêra cezakerdiş.
Hemşedara Hênêyî ya Amedî Besîle Narîn bi îdiaya “endamîya rêxistinî” yena muhakemekerdiş. Roniştişê doza Besîle Narîne Dadgeha Cezayê Girane ya Amedî ya 4ine de ame viraştiş. Besîle Narîn beşdara roniştişî nêbî la avûkatê a Yusuf Çakas hadre bî.
Dozgerî, çalakîyê ke Besîle Narîne demê verênî de beşdarî bîya sey hincet nîşan da û waşt bi îdiaya “endamîya rêxistinî” bêra cezakerdiş. Avûkat Çakas zî seba verba mutalaya pawitişî ya muwekîla xo bikero, dem waşt. Dadgeh waştişê Çakasî qebûl kerd û roniştişê doze taloqî 18ê Adare kerd.
