Fatma Bostan Unsal vengdayîşê ‘Aştî û Komelo Demokratîk’ yê Rayberê Şarê Kurd Abdullah Ocalanî erjna û dîyar kerd ke akerdişê kanalanê sîyaseto demokratîk û teqezkerdişê azadîya fikran seba prosesê aştî şertê bingeyîn ê.
Zanyara Sîyasetî û Pawitoxa Heqanê Merdiman Fatma Bostan Unsal vengdayîşê ‘Aştî û Komelo Demokratîk’ yê Rayberê Şarê Kurd Abdullah Ocalanî û proseso ke do ey reyde aver şêro Ajansê ANF’yî rê erjna.
Fatma Bostan Unsal ard ziwan ke êdî meseleyê muxatabbîyayîşê Abdullah Ocalanî cayê munaqeşeyê nîyo û dîyar kerd ke no hetê komele ra zî ameyo qebulkerdene. Unsal ard ziwan ke bihêzbîyayîşê PKK’yî astengîyanê vernîya sîyaseto demokratîkî ra ameyo meydan û vat ke no tena meseleyê çekronayîşî nîyo, eynê wextî de seba çareserîya meseleyê kurdî yo zî.
Fatma Bostan Unsal dîyar kerd ke şer tena nêbeno sebebê vîndîbîyayîşanê merdimî û zerarê aborî, eynê wextî de bi manayanê ‘têkoşînê vera terorî’ azadîye zî ameya sînorkerdene.”
‘Ganî kanalê sîyaseto demokratîk bêrê akerdene’
Fatma Bostan Unsal da mojnayene ke ganî dewlete kanalanê sîyaseto demokratîkî zî akera û vat: “Seke vengdayîşî de zî bi hewayêko zelal ame vatene, ganî dewlete kanalanê sîyaseto demokratîk akera û azadîya fikir û azadîya rêxistinbîyayîşî bîyara ca. Serkewtişo tewr pîl yê prosesî seba qiseykerdişî peydakerdişê platformêko hîna hîra yo. Çinbîyayîşê nîzamanê qanûnî kemaneyî yo. Tayînkerdişê qeyûman, dewayê vera sîyasetmedaranê kurdan û girewtişê rêxistinanê sivîlan, heqanê sîyasî bisînor keno. Astengîyê vernîya xebatanê perwerdeyîya Kurdkî û xebatanê kulturî mîyanê problemanê ke paweyê çareserî de yê, înan de yo.”
Fatma Bostan Unsal ard ziwan ke pêvînayîşo bi Rayberê Şarê Kurd Abdullah Ocalanî reyde gama tewr pîle ya prosesî ya û vat ganî derheqê rewşa Rayberê Şarê Kurd Abdullah Ocalanî de amadekarî bêrê kerdene. Unsal dîyar kerd ke seba proses aver şêro ganî qanûnê ke azadîya fikirî binpay kenê, bêrê hewanayene. Reyna ganî pênaseyê terorî bêro tengkerdene û rewşê ke sûc nîyê, çarçeweya terorî de nêrê hesibnayene.
Fatma Bostan Unsal tewr peyên dîyar kerd ke ganî çapemenî prosesanê aştî de rolêko muhîm kay bikero û vat ke sazîyê çapemenî yê ke nêzdîyê dewlete yê, eşkenê hemkarîyanê pozîtîfan bidê prosesî.
