Seba Endamê Heyetê Îmraliyî yê DEM Partî Sirri Sureyya Onderî Stenbol de tezîye ameye ronayene.
Endamê Heyetê Îmraliyî yê DEM Partî û Serekwekîlê Meclîsî Sirri Sureyya Onder 3ê gulane de Stenbol de nêweşxaneyo ke tede ameyêne tedawîkerdene, uca de şi heqîya xo. Onder vizêr bi beşdarîya des hezar kesan ame definkerdene. Seba Onderî Merkezê Konseran ê Cemal Reşît Reyî yê Şîşlî de tezîye ameye ronayene. Keyeyê Onderî, Hemserekê Pêroyî yê DEM Partîyî Tulay Hatîmogûllari û Tuncer Bakirhan, Endama Heyetê Îmraliyî Pervîn Buldan û xeylê partîyî kesanê ke yenê tezîye, pêşwazî kenê.
Alî Babacanî ra zîyaretê tezîyeyî
Serekê Pêroyî yê DEVA Partî Alî Babacan û Parlamenterê DEVA Partî Mehmet Emîn Ekmen beşdarê tezîyeyî bîyê. Alî Babacan û heyeto ke ey reyde yo, serweşîye waşte.
Zîyaretê tezîyeyî do heta saete 17:00î bêrê kerdene. Ame zanayene ke tezîye do heta 3 rojan dewam bikera.
